Qeveria shqiptare tregohet shumë vigjilente ndaj zhvillimeve në Shtetet e Bashkuara të Amerikës, sidomos kur bëhet fjalë për “non grata” në Shqipëri e në botë.
Por, çuditërisht, nga i pari i qeverisë e deri tek i fundit, nuk u treguan aspak vigjilentë, kur Thesari Amerikan i Shtetit sanksionoi oligarkun rus, Oleg Deripaska, në Prill 2018.
Pas kësaj date, një kompani e lidhur me Deripaskën në Shqipëri, ka përfituar rreth 20 milionë euro nga Fondi Shqiptar i Zhvillimit.
Siç raportoi “Gijotina.com” pak ditë më parë në mënyrë ekskluzive, Deripaska dhe kompania shqiptare e kontrolluar prej tij për një kohë të gjatë, “Trema Engieenering 2”, kanë përfituar tre tendera, me vlerë totale mbi 20 miliardë lekë të vjetra nga Fondi Shqiptar i Zhvillimit.
Dritan Agolli i ka dhënë këto kontrata në periudhën 2019-2021, pra pasi Deripaska ishte sanksionuar nga Shtetet e Bashkuara të Amerikës.
Por, nuk përfund këtu. “Gijotina.com” mëson se kompania me pronar fundor oligarkun pranë Putinit ka marrë edhe 400 mijë euro të tjera nga “Albcontrol”, në kohën kur drejtohej nga zv.kryeministrja aktuale, Belinda Balluku.
Milionat e Ballukut për Deripaskën
Në janar 2019, Belinda Balluku merr bekimin e kryeministrit Edi Rama për drejtimin e Ministrisë së fuqishme të Infrastrukturës.
Vetëm pak ditë para se të merrte postin qeveritar, Balluku mbylli të gjitha llogaritë me Albcontrol-in. këtu përfshiheshin edhe nënshkrimi i kontratave për tenderat që sapo kishin përfunduar në atë kohë.
Një ndër këto tendera ishte “Rehabilitimi i Qendrës së Kontigjencës në Albcontrol”. Procedura ishte shpallur në shtator të vitit 2018 dhe fondi në dispozicion ishte 416 milionë lekë të vjetra.
Në tender marrin pjesë dy operatorë ekonomikë. Njëri prej tyre skualifikohet nga Belinda Balluku dhe stafi i saj, pasi nuk kishte paraqitur ofertë ekonomike, duke krijuar dyshimet se ishte përfshirë “fiktivisht” në garë.
Procedura tenderuese mbyllet në 31 dhjetor të vitit 2018. Fitues shpallet bashkimi i operatorëve “Trema Engieenering 2” dhe “Rruga Ura Asfaltim 2”, me ofertën ekonomike 387 milionë lekë të vjetra.
Është për t’u theksuar se, në Dhjetor 2018, kur u mbyll ky tender, Oleg Deripaska ishte sanksionuar nga Thesari i Shteteve të Bashkuara.
Kompania “shqiptare” e Deripaskës
Për disa vite, kryesisht në periudhën 2016-2022, kompania “Trema Engiennering 2” ka pasur si pronar fundor biznesmenin rus, Oleg Deripaska.
Kompania shqiptare kontrollohej nga shoqëria me seli në Austri, “Strabag Ag”.
Oleg Deripaska ka qenë një prej aksionerëve të kompanisë mëmë austriake, (me 25 përqind të aksioneve) që në vitin 2007.
Në vitin 2021, kur ligji shqiptar detyroi kompanitë që të regjistronin pronarët përfitues, Oleg Deripaska u shënua si pronar fundor në shoqërinë “Trema Engieenering 2” dhe “Strabag Ag-dega e shoqërisë së huaj.
Ai mbajti këtë pozicion deri në mesin e vitit 2022, kur shumica e aksionerëve të kompanisë mëmë në Austri vendosën të shkëpusnin raportet financiare me miliarderin rus, Oleg Deripaska, pasi ai u sanksionua në seri nga Shtetet e Bashkuara të Amerikës dhe Mbretëria e Bashkuar.
