Kreu i grupit parlamentar i Partisë Socialiste, Taulant Balla komentoi sërish fitoren e Sali Berishës si kryetar i PD duke thënë me ironi se sot është një ditë që në selinë blu priten bakllava e revani.
“Unë jam i qetë, nuk shqetësohem as për embargon e Shqiponjës. Sa për meqenëse u bë debat për garën historike, të gjithë ishin të shqetësuar mes dy kandidatëve shumë të rëndësishëm, Elezit dhe Berishës, një moment ishte Elezi lart.. jo jo nuk e kam me ty Xhaferri, i pafshi hajrin, madje sot priten revani e bakllava, ta gëzoni dhe ia pafshi hajrin, një gjë dua t’jua them. Nevoja e Falconeve shqiptarë, ne do i kemi, i kemi djem e vajza prokurorë”, tha Balla.
Duke kujtuar shpalljen non grata nga SHBA, Balla tha se Berisha duhet të sqarojë korrupsionin e tij dhe arsyen pse SHBA kanë arritur në këtë përfundim.
“Shqipëria ka nevojë për Falcone. Sot pas 30 viteve Shqipëria ka më shumë se kurrë nevojë për Falcone. Se nëse do kishim e unë shpresoj ti’ kemi në ditë në javët, muajt e vitet që pasojnë, as Sali Berisha e askush tjetër s’do vinte t’i dërdëlliste shqiptarëve sot pas 31 vitesh në politikë për çështje të korrupsionit. I fundit jo në këtë sallë, por në gjithë 31 vite pluralizëm në Shqipëri që të ngrejë gishtin e të sulmojë kolegët qoftë nga krahu vet apo kundërshtar për korrupsion është Sali Berisha. Kur Berisha të ngrejë akuzën për korrupsion ndaj kujtdo në politikë lutem ta injorojmë të gjithë. Se Berisha duhet të sqarojë korrupsionin e vet në radhë të parë, arsyen pse SHBA kanë arritur në këtë përfundim”, shtoi ai.
