Xhemi Agaj emigroi drejt Kanadasë me një ambicie të madhe. Agaj përfundoi studimet për aktrim në vitet ’90, kur më pas u largua nga Kosova para kohës së luftës. Në një intervistë për emisionin “Abc-ja e mëngjesit”, aktori tregoi hapat e parë për të hyrë në kinematografinë kanadeze. Para se të largohej, ai ka pasur disa angazhime në Kosovë në shfaqje të ndryshme të kohës.
“Me shumë sakrificë ika pak para kohës së luftës. Jam diplomuar në Universitetin e Arteve në Prishtinë, u largova me një ambicie të madhe. Ishte e vështirë në fillimet e para. U gjenda pas 6 muajsh në një agjenci aktorësh, kisha një lloj frike. Nuk e dija shumë mirë gjuhën. Më dhanë një tekst, kisha 30 minuta kohë për t’u përgatitur. U stepa pak por më pranuan dhe firmosa kontratën.”, tha ai.
Roli i parë që ka luajtur në Kanada ka qenë në filmin “Haven” Alliance Atlantis/CBS/John Gray. Në një ndër serialet më të suksesshëm “Flashpoint”, i shitur në më shumë se 50 vende, ka qenë i ftuar special. Ndërkohë më vonë është shfaqur në më shumë se pesëdhjetë vende të ndryshme të botës.
I njohur më së shumti për rolet negative, aktori shqiptar thotë se: “Njerëzit që janë të mirë dhe të butë në jetën e përditshme e kanë shumë më të lehtë të luajnë role negative. Ata që luajnë role negative janë më të mirët të mundshëm që mund të takosh, ndërsa ato që luajnë role pozitive kanë probleme dhe mundohen të tregohen më të mirë sesa janë.”
