Nga Agron Gjekmarkaj
Babo gezuar e për shumë mot ditëlindjen ! Qesh natyra nga gëzimi. Marrësh nga ditët e Tigrushit , Blendit , Ulsiut dhe Tezes. Nga të Nikos mos kërko se nuk të jep gjë. Vitet tutje e ti tehu. Me katër korrik 1964 erdhe në jetë si simbol i miqësisë me SHBA-të ndonëse atë mot Çu En Lai na vizitoi. Ditë me diell qe dhe ti nuk qaje, por rënde rrije. Komshinjtë u gezuan , bënë këqyrjet e rastit tek vendi dhe të menduar thanë do bëjë rrugë e do çajë male trazovaçi!
Mimi di Puccini të priste aty për të të rrëfyer udhët e jetës , duke të marrë per dore si Virgjili Danten. Ne po festojmë këtë ditë të shenjtë në Birmingam ku punet na sollen me Ermon , Damon dhe Helidonin. Aty gjetëm dhe Fatmirin i cili pinte çaj , xhinxher e kamomilera me lorder e kongresmenë për të qetësuar midenë nga streset e moskuptimit që Tirana i shkakton.
Gezimi na rrembeu dhe mbeta pa bashkëndarë gjera themelore të ketij udhëtimi. U ndje mungesa e Ditmirit i cili ka drejtuar delegacionin shqiptar në asamblenë parlamentare të OSBE. Paçi faqen e zezë na thanë, ku e kini atë djalë që punët e Europes dhe paqes shkoqit?
Damo nuk fliste thjeshtë përlotej, i kujtohej traktori me jonxhe ngarkuar kur e solli të kongresi i vazhdimësisë për diskutimin. Unë edhe flisja e nga pak qaja, po kaq Helidoni si shkodrani për shkodranin madhengjehej. I thamë ka çilimiqer për të mbajtur, e gjeni sa në një aeroport aq në një tjeter.
Drito , kishte ambicie të përdala Babo, donte të drejtonte edhe OSBE-në kur Shqipëria mori kryesinë e saj, por ti Babo bere mire që nuk ja le se një udhëheqës e brand ndërkombëtar ka atdheu ynë . E ai je veç ti dhe të marrshin të keqen sot që mbushe 58 vjeç si nur i vatanit , më shumë se kurrë.
Vetë more dekretin e ministrit të Jashtëm nga Meta dhe menjëherë atë të kryesuesit te OSBE për 1 vit, ndërkohe që Gent Caka rrinte ne zyre e lozte me trenin elektrik çiaf çiuf ty ty ty ty çiaf çiuf.
Njëherë që i shkova në zyrë Xhaçkes, për trenin e pyeta ! E kishte marrë me vete çapkëni, aty veç shinat kishte lenë dhe dy kamionë kauçuku si hajmali.
Lul Basha mos bëftë hajer që nuk e caktoi Fate Mediun në delegacionin parlamentar të OSBE. Tani ai hyn nga penxherja neper takime i shkreti. Qaja hallin Babo bëji derman. Ai tha me mirësi të tejkalojmë partitë dhe të shohim ty si dritën e diellit. Pastaj flet mirë anglisht dhe ka stof intelektuali anglosankson që e kreshpëron boten me yndyrë mendimi.
Babo, Damua bëri një sërë sakrificash për delegacionin. Nga sot nën dritën e fakteve ai po shndërrohet në personazh pozitiv ose njeriu i mirë Damo. Nuk pat asnjë mëdyshje në pagimin e birrave të para ( tani të shohim) dhe me duket si investimi më i mirë që po bën për imazhin e tij të trazuar. E vlerësova lart vendosmërinë e tij dhe e nxita ta promovojë këtë virtyt të fshehtë. Damo të do qamet Babo. Një e dy “Kurbanin” citonte. Në faqen 24 kështu ka thënë Babo, te 76-ta këtë e kështu me rrallë. Nuk besoj ta ketë as Elisa këtë përpikëri. Tao jo e jo se ai lexon Habermasin dhe Lakanin. U gëzova shumë për këtë kujtesë. Gati më mirë se “Kanunin e Himarës” ku gjetëm dakordesi e njihte, të cilin ti si nip i asaj ane e ke elaboruar në lartësi duke i dhënë kuptim e marifet.
Me Ermon takuam Kryetarin e Parlamentit Anglez. E ftuam në Shqipëri se Zonja Linditë na e la amanet. I shkoqitem dashurinë e madhe të popullit tonë për Inglizin dhe sukseset e tij në udhëheqjen tënde dhe ju lutem të na lehtësoje procedurën prej ferri me vizat. E madhengjyem. Lum Kuvendi qe ju ka tha ty ( mua dmth) dhe Ermon.
Këtu në asamble në Birmingan të gjithë pyesin për ty Babo, kërkojnë që pikturat e tua të ekspozohen kudo, Kurbani të futet në shkolla, dhe me lejen tënde edhe disa nga fjalimet e ministrave të t’u si eksperience për këta qerratenjet e dhomës së komunave. Dhe kur nge të keni thanë bëjuani kabull një vizite bashkë me ekipin qeverisë që ta nxirrni këtë ishull nga prapambetja dhe të ece me hapin e shokëve. Posaçërisht kërkuan fjalimet e Ulsi Manjes sepse duan të reformojnë Carta Manjen . Një deputete konservatore e Mançesterit pyeti per Albanën dhe përvojën e saj në brymosjen e frymes së protestës tek gratë. Lordët angleze tanimë kopjonin Dash Sulen në sqimen e të veshurit. Helidoni se kishte besuar po tani që pas Damos edhe Anglezet ja thanë është i qetë se thotë për çdo gjë: e di Babo.
