Në një intervistë për revistën e njohur franceze “BeauxArts Magazine”, kryeministri Edi Rama ka zbuluar detaje të panjohura të familjes së tij. Rama ka zbuluar se babai i tij, Kristaq Rama, ka qenë i martuar me një grua ruse, e cila u detyrua të largohej për në Bashkimin Sovjetik pas prishjes së marrëdhënieve me Shqipërinë.
Duke folur për shtytjen e parë për t’u përfshirë në politikë, Rama tregon telefonatën e ish-Kryeministrit Fatos Nano, i cili i propozoi për të marrë detyrën e ministrit të Kulturës në vitin 1998.
Rama tregon tmerrin e jetës artistike nën zgjedhën e diktatorit Enver Hoxha, të cilin e ka njohur kur ishte djalë i ri, dhe politikën kulturore që ai ka nxitur.
Në intervistën prej tetë faqesh me titull “Shqipëria vendi im si askush tjetër”, revista franceze shkruan se “Edi Rama, 57 vjeç, është një politikan i pazakontë jo vetëm në Evropë, por edhe në mbarë botën. Ai është në fakt i vetmi artist, njëkohësisht kryeministër, veprat e të cilit janë ekspozuar në galeritë dhe muzeumet më të mëdhenj të planetit”.
