Ministri i Drejtësisë, Ulsi Manja ka reaguar në lidhje me debatet që ka shkaktuar harta e re gjyqësore, e cila ka ngjallur një sërë reagimesh në opinionin publik. Pas protestës së avokatëve të cilët thanë se nisur nga nesër ata do të bojkotojnë seancat gjyqësore, Manja thekson se harta e re është në përputhje me paketën e reformës në drejtësi.
Në një prononcim për ATSH, Manja u shpreh se bojkotimi i seancave gjyqësore nuk i shërben askujt, ndërsa apelon që avokatët të kontribuojnë në zbatimin e hartës së re gjyqësore.
“Ajo që ne presim nga Dhoma Kombëtare e Avokatisë dhe çdo avokat është që të kontribuojnë në zbatimin e hartës së re gjyqësore pasi ajo të miratohet në Qeveri dhe të hyjë në fuqi. Bojkotimi i seancave gjyqësore nuk është zgjidhja e duhur dhe nuk i shërben askujt, as sistemit të drejtësisë, as avokatëve dhe aq më pak interesave të qytetarëve që mbrohen prej tyre. Si njerëz të ligjit, unë besoj se avokatët do të reflektojnë në vendimin e tyre pasi zbatimi i ligjit është emëruesi i përbashkët i yni dhe që i shërben drejtësisë dhe interesit publik”, shprehet Manja.
