Austria do të mbyllë shtatë xhami dhe do të dëbojë 40 imamë, njoftoi kancelari austriak në një konferencë për mediat duke u shprehur se ky hap është pjesë e masave ndaj “islamit politik”.
Kurz tha gjithashtu se Ministria e Kulturës dhe ajo e Brendshme kanë përfunduar hetimet ndaj disa xhamive dhe shoqatave. Nga hetimet e kryera aktivitetet e shtatë Xhamive kanë rezultuar të ndaluara. Një nga xhamitë qe do të mbyllet në Vjenë me argumentin se vepron ilegalisht drejtohet nga një organizatë nacionaliste turke e e njohur si “Ujqërit Gri” .
Për mbylljen e kësaj xhamie Turqia ka reaguar menjëherë përmes zëdhënësit të Presidentit Erdogan, Ibrahim Kalin duke thënë se ky “Vendim do të pasojë një valë islamofobie, racizmi dhe diskriminimi.
Praktikat e ndjekura nga Qeveria austriake janë në shkelje të të drejtave themelore universale, politikave të integrimit dhe të drejtave për minoritetet”. Në Austri jeton një komunitet prej 600 mijë myslimanësh, shumica e të cilëve janë me origjinë turke.
Qeveria e djathtë austriake që para ardhjes së saj në pushtet kishte shprehur kundershtinë ndaj emigracionit dhe refugjatëve dhe kishte pohuar gjithashtu se do të largonte nga vendi imamët që sipas tyre predikojnë dhunë. Edhe në vitin 2015 Austria me anë të një Projektligji parashikonte ndalimin e financimeve për grupet fetare dhe “detyronte” shoqatat islamike që të kishin një qasje thelbësisht pozitive kundrejt shtetit dhe shoqërisë austriake.
