Nga Armando Mosho
Shqipëria gjendet në prag të revolucionit popullor, pikërisht atëherë kur duhej të ishte në kulmin e qetësisë, ndoshta në javën më të rëndësishme për shtetin e ri të Kosovës, por fatkeqësisht cdo event historik i Kosoves e gjen Shqipërinë në tym, duke mos qënë në gjendje ti dalë Zot vehtes e jo më të artikulojë qoftë edhe një fjalë të vetme në mbështetje të trojeve shqiptare.
Në mua kjo gjë nuk është rastësi. Kjo është pasoja e klasës politike të zgjedhur në Shqipëri, një klasë e kapur, e lidhur me njëmijë fije të errëta që dihen se ku perfundojnë. Një klasë politike e kalbur, e fëlliqur dhe antishqiptare -si e tillë, dua ti uroj kësaj klase politike “një fund të tmerrshëm”!
Më herët kam shkruar nevojën e ndryshimit të mentalitetit të shqiptarëve, me të cilën kam nënkuptuar se shqiptarët pa përjashtim duhej të kërkonin më herët atë që kërkojnë sot studentët
– vendosjen e një sistemi të drejtë, që nuk deformon dhe denigron njeriun dhe si rrjedhojë i mundëson atdheut zhvillimin.
Ka disa shprehje lidhur me rëndësinë që duhet ti jepet një arsimimi cilësor, por dy i kam të mbërthyera fort në kokën time:
1- nëse do të bësh një investim që zgjat qindra vite, investo në arsim.
2- një investim në arsim, paguan normën më të mirë të kthimit.
Mirëpo në Shqipëri është katapultuar në pushtet një klasë politike që edhe në këto momente që janë duke vdekur, jam i bindur se qeshen me dy shprehjet që kam shkruar më lart. Sepse ata/o nuk janë ngjitur aq lart nga investimi në arsimim, por me të tjera pelivanllëqe. Shumë thone se: cdokush e blen cdo pozicion që e merr në Shqipëri – ose e parapaguan dhe nuk shqetësohet gjatë qëndrimit në post ose e paguan me këste mujore tek eprori direkt gjatë gjithë qëndrimit dhe kur emërimet jane kështu, korrupsioni natyrshëm do jetë kapilar dhe do të përhapet si një kancer mbi gjithë shoqërinë.
Unë besoj 100% cdo student për cdo denoncim që kanë bërë me pankarta në shesh. Shqipëria prej një kohe të gjatë qeveriset nga banda kriminale, shushunja gjakpirëse që vetëm sa ndërrojnë vendet me njëri-tjetrin, me marrëveshje që të mos prekin njëri-tjetrin reciprokisht dhe me forcën që ju jep pushteti zgjedhin gjithmonë forcën ta përdorin kundër qytetarit.
Shqiperia është një vend i pasur dhe i shumë- keq-qeverisur për vite me rradhë dhe duket se është ky momenti kur klasa e kalbur politike po vdes ose sic thuhet ndryshe e ka ngrënë ujku ose hëngri derrin.
Në një shkrim të mëhershëm publik me idenë për të bërë më të mirën për atdheun pata shkruar disa rrjeshta për përzgjedhjen e një trupe të mirë legjislative dhe qeverisëse, por ai që sot ju lutet për dialog studentëve ka deklaruar cdo herë se nuk lexon dhe nuk përfill asnjë mendim të ndryshëm (sic diktatorët bëjnë) për rrjedhojë edhe nuk mundet të kuptojë gjëra të reja, të ndryshme nga truri i zbardhur prej pluhurit.
Unë nuk do të mundem dot kurrë të gjejë fjalë më të sakta sesa atëhere dhe mendoj se atdheut më duhet t`ja ripërsëris atë paragraf që thotë:
“Eshtë e lehtë, e lehtë në mënyrë qesharake , të hartosh një model për zgjedhjen e një trupe ekzekutive dhe legjislative.
Së pari – duhet të vendosësh mënjanë njerëzit e ndershëm dhe të denjë për t`ju besuar vendin, që në të njëjtën kohë janë dhe ekspertë në ndonjë fushë, nëpërmjet një veprimi reciprok dhe njohje të kapaciteteve të tyre. Pastaj mes këtyre do të duhet, në një shoshitje më të ngushtë, të zgjedhësh njerëzit më kompetentë dhe të ditur, të dorës së parë, në secilin specialitet, njësoj nëpërmjet një njohjeje dhe garancie reciproke. Kështu, i përbërë prej ketyre, trupi legjislativ do të duhet së fundi për secilin rast të veçantë, të vendosë vetëm notat dhe gjykimet e komponentëve më të specializuar dhe ndershmëria e të gjithë të tjerëve duhet të jetë aq e madhe sa të mjaftojë për të kuptuar thjesht leverdinë e të lënit vetëm në dorë të këtyre votimin mbi këto gjëra, në mënyrë që ligji, në kuptimin më të ngushtë të rrjedhë nga arsyeja e më të arsyeshmëve.
Një përparim i rregullt dhe i shpejtë është i mundur, dhe kushti i vetëm për këtë është që secili në fushën e tij të ketë konkurrentë jashtëzakonisht mosbesues dhe që tia shohë mirë gishtat. Nga ky afrim i mosbesuesit lind drejtësia në republikën e të diturve.”
Rinia e Shqipërisë janë aseti më i vyer dhe janë shpresa e vetme e shqiptarëve në një të nesërme më të mirë.
Ata qësot zgjedhin të denoncojnë pedagogët e tyre si të korruptuar, janë shpresa se nesër do të vendosin sistemet perëndimore të kontrollit mbi financat publike. Kështu që për mua Rinia e mencur Shqiptare nga ky moment e në vazhdim, me dashurinë e madhe për gjithë trojet ku flitet shqip duhet të mos ta ndalë protestën deri në rrëzimin e sistemit më të kalbur politik, që përhapi sëmundje e mbolli tmerr gjate dy dekadave të shekullit 21në Shqipëri.
