Gjykata ka vendosur masën e sigurisë “detyrim paraqitje” për të 15 protestuesit e arrestuar gjatë protestave të organizuara nga Partia Demokratike, duke rrëzuar kështu kërkesën e organit të akuzës për masë më të ashpër ndaj disave prej tyre.
Prokuroria kishte kërkuar masën “arrest me burg” për 5 prej të ndaluarve dhe “detyrim paraqitje” për 10 të tjerët.
Megjithatë, gjykata vendosi që të 15 të ndaluarit të hetohen në gjendje të lirë nën masën e detyrimit për t’u paraqitur.
Në një prononcim pas seancës, deputeti i PD Gjin Gjoni i cilësoi arrestimet si një formë represioni ndaj qytetarëve dhe protestuesve të pafajshëm që i janë bashkuar protestës së opozitës.
Sipas tij, këto masa represive vetëm sa po e shtojnë numrin e pjesëmarrësve në tubime.
Ai deklaroi se arrestimet janë të paligjshme, duke argumentuar se organi i akuzës nuk ka paraqitur asnjë provë, pamje filmike apo dokumentacion tjetër që të vërtetojë akuzat ndaj tyre.
“Këta janë të pafajshëm, sepse nuk rezulton që ka ndonjë provë në ngarkim të tyre”, u shpreh Gjonii.
Mbrojtja ligjore bëri të ditur se do të vazhdojë betejën ligjore për t’i cilësuar këto arrestime në flagrancë si të paligjshme, duke iu referuar edhe rasteve të mëparshme ku gjykata ka marrë vendime të ngjashme duke i konsideruar arrestimet si të paligjshme.
Deklarata:
Padyshim një lloj represioni që bëhet ndaj qytetarëve dhe protestuesve të pafajshëm, të cilët po i bashkohen dita ditës protestës së Partisë Demokratike.
Sa më shumë të arrestohen, të jeni të sigurtë aq më shumë do jenë edhe njerëzit të cilët do paraqiten në radhë të tjera dhe padyshim numri i tyre po shtohet edhe i njerëzve edhe për shkak të masave represive që qeveria po vendos ndaj protestuesve të pafajshëm dhe njerëzve të cilët kalojnë rastësisht në rrugët e kryeqytetit ditët e organizimit të protestave nga ana e Partisë Demokratike.
Kështu që unë besoj edhe me ndihmën e kolegëve të cilët, edhe të avokatëve të cilët kanë qenë prezent në seancë, ne do vazhdojmë edhe luftën ligjore për t’i nxjerrë të gjitha këto arrestime në flagrancë si arrestime të paligjshme, ashtu siç ka ndodhur edhe në rastet e kaluara ku një pjesë e madhe janë konsideruar arrestime të paligjshme dhe njëkohësisht janë pa masë sigurimi.
Por edhe në këto kushte që janë, unë them që ne, këta janë të pafajshëm, për arsye sepse nuk rezulton që ka ndonjë provë në ngarkim të tyre, nuk ka pamje filmike dhe nuk ka dokumentacion që të provojnë në lidhje me akuzat për të cilat organi i prokurorisë ka sjellë përpara gjykatës.
