“Big Brother VIP” është kthyer në një ndër programet më të ndjekura dhe më të komentuara nga publiku në Shqipëri. Ky format në historinë e tij ndër vite ka zgjatur vetëm 3 muaj, por ky edicion dukshëm nuk do t’i përmbahet këtij rregulli. Siç është lajmëruar “Big Brother VIP” do të shtyhej deri në 18 shkurt, pas aprovimit të banorëve, por mesa duket produksioni ka në plan të shtyjë akoma më shumë finalen e madhe.
Moderatorja Arbana Osmani në një intervistë ka zbuluar detaje lidhur me këtë format, ku thekson se mund të jenë në transmetim përtej datës 18 shkurt që është konfirmuar deri në këto momente.
“Në plan profesional kanë qenë dy ngjarje të rëndësishme për mua: mbyllja me sukses e 5 viteve “Dua të të bëj të lumtur” , dhe gjithashtu rifillimi i Big Brother, kësaj herë në edicionin VIP, që është më i shikuari, më i diskutuari dhe komentuari. Është kthyer tashmë në një fenomen social, është bërë pjesë e shoqërisë shqiptare”, tha ajo.
Por a priste Arbana që Big Brother të kishte këtë sukses?
Arbana: Arsyeja kryesore pse unë pranova ta prezantoj menjëherë këtë spektakël, ka qenë përfshirja e Lori Hoxhës si producente, dhe kjo ka qenë një garanci për mua, që Top Channel do të bënte maksimumin, që ky program do të shkëlqente në çdo pikëpamje. Kështu që po, e prisja, i gjithë stafi ka qenë shumë i motivuar që nga fillimi.
Po cilin nga personazhet e larguar do të donte Arbana, ta shihte ende brenda shtëpisë?
Arbana: Më ka ardhur keq për të gjithë, dhe realisht është e vështirë sa herë që del një i eleminuar nga shtëpia, të vjen keq sepse janë si pjesë e shtëpisë. Më ka ardhur më tepër keq për Fifin, e cila ishte absolutisht nje personazh i jashtëzakonshëm brenda BB VIP.
Cilat janë momentet që kanë shënjuar spektaklin sipas saj?
Arbana: Do thoja hyrja e Borës në shtëpi, puthja me Donaldin, largimi i Fifit, momenti kur ajo është ndjerë keq brenda në shtëpi në një transmetim live, apo dalja e papritur e Big Mamës nga shtëpia.
