Partia Demokratike ka reaguar një ditë pas anulimit nga Komisioni i Prokurimeve Publike të tenderit prej 500 milionë lekë, që kreu i Fondit Shqiptar të Zhvillimit i dha kompanisë së djalit të tij për përgatitjen e menusë së “100 fshatrave”.
Në një deklaratë për mediat nga selia blu, deputeti Arbi Agalliu thotë se nëse nuk do të ishte denoncimi i PD dhe reagimi publik, paratë e taksapaguesve do të vidheshin.
“Komisioni i Prokurimit Publik thotë se ka anuluar tenderin abuziv 500 milionë lekësh të fondit shqiptar të zhvillimit për dizenjimin e menusë së 100 fshatrave. Nëse nuk do të ishte presioni publik pas publikimit të fakteve se si Fondi Shqiptar i Zhvillimi kishte paracaktuar fituesin e tenderit, ky tender nuk do të ishte anuluar dhe paratë e shqiptarëve do të përfundonin në xhepat e pushtetarëve të korruptuar. Por po kështu dhe nisja e hetimit nga SPAK ka nxitur Komisionin e Prokurimit Publik të heqë përgjegjësinë ligjore. Në arsyetimin e tij, komisioni ka faktuar se kriteret e vlerësimit teknik nuk janë në përputhje me legjislacionin për prokurimin publik, çka është një provë më shumë për SPAK, për të çuar para drejtësisë mikun e Ramës, Dritan Agolli. Ndërkohë që fshatrat s’kanë rrugë, drita e ujë, s’kanë asnjë investim të kryer apo planifikuar, qeveritarët e korruptuar duan të vjedhin paratë e tyre përmes tenderëve për menu”, tha Agalliu.
Ndër të tjera, deputeti demokrat i bëri thirrje SPAK të çojë para drejtësisë zyrtarët e korruptuar që shpërdorojnë taksat e qytetarëve, pasi sipas tij qeveria ka mendjen si të përfitojë nga një listë gatimesh me vlerë prej 500 milionë lekësh.
