Një nënë e 4 fëmijëve në Britaninë e Madhe thotë se i dashuri i saj shqiptar e përdori për të trafikuar njerëz dhe më pas e braktisi. Melanie Edwards, 40 vjeç, u arrestua nga doganat franceze pasi kishte futur në bagazhin e makinës së saj të dashurin Fisnik Misini, 23 vjeç dhe kushëririn e tij.
Por pavarësisht kësaj sakrifice, ai e la sapo mori atë që donte dhe kapi një tjetër ‘viktimë’. “Më shkatërroi jetën. Unë nuk jam kriminele. Jam pak vulnerabël dhe u besoj njerëzve. Ka qenë shumë e vështirë për mua. Kam humbur 16 kilogramë nga stresi”.
Shtëpiakja britanike madje i dërgoi Fisnikut edhe 500 sterlina për ta ndihmuar që të kthehej ilegalisht në Britani disa javë pasi e kapën. Edwards, që ka edhe një fëmijë autik, thotë se u dashurua me shqiptarin përmes rrjetit social, Facebook.
“Më thoshte gjithmonë se më dashuronte dhe mendoja se e kishte seriozisht”. “Isha e dashuruar me të dhe bëja gjithçka për ta kënaqur”. “Miqtë dhe familja më thonin se ai ishte një vezë e keqe, por unë e mbroja. Më bëri lavazh truri”.
Edwards ka dalë përpara gjykatës me akuzën e trafikut të qenieve njerëzore, por i shpëtoi dënimit me burg. Për fat, gjykata i dha një dënim me burg të pezulluar. “Isha bërë gati për burgun, madje kisha paketuar gjërat”.
Edwards, e martuar me një ndërtues, të quajtur Lee, pranoi një ftesë në FB nga Misini në tetor të vitit 2014. Ata nisën të flasin, ndërsa shqiptari insistonte që të takoheshin personalisht. “Pranova ta takoj në një kafene. Ky ishte vendimi më i keq në jetën time. Fillimisht m’u duk sharmant, u dashurova me të pasi më dukej një xhentëlmen perfekt. Por nisi të ndryshonte dhe u bë shumë posesiv”.
Misini ishte emigrant ilegal në Britani pasi kishte mbërritur i fshehur në një kamion. Vitin e shkuar, në qershor, shkuan për një vizitë në Calais të Francës, ku u takuan me kushëririn e Misinit. Ata e detyruan atë që t’i fshihte në bagazhin e makinës, një Nissan Qashqai. Ajo u arrestua nga dogana franceze, kurse shqiptarët u deportuan./mapo/
