Më 18 dhjetor, në Ditën Kombëtare të Diasporës po zhvillohet mbledhja vjetore e Këshillit Koordinues të Diasporës. Të pranishëm janë kryeministri Edi Rama dhe ministrja për Evropën dhe Punët e Jashtme, Olta Xhaçka.
Teksa fliste për emigrantët që ndodhen jashtë Shqipërisë dhe sfidat me të cilat i duhen të përballen, kryeministri Rama shfrytëzoi momentin për të bërë të qartë se nuk është tërhequr nga propozimi për amnistinë fiskale.
Ndonëse një projekt ligj që ka shkaktuar mjaft debate dhe është kundërshtuar nga ndërkombëtarët, opozita apo ekspertë të ekonomisë se ligji në fakt do të shërbejë për të pastruar paratë e krimit të organizuar, Rama tha se amnistia fiskale duhet të ishte bërë më herët.
“Marrëdhënia mes Diasporës është dinamike, me probleme që asnjëherë nuk shterojnë sepse kohët ndryshojnë. Interesat dhe lidhjet mes vendit më dhe bijve të vetë të shpërndarë nëpër botë marrin trajta të ndryshme në funksion të kohës. Gjeneratat përballen me sfida të ndryshme. Bota transformohet. Nga ana tjetër është interesante që të shihet dhe të mos harrohet që kontributi i të ikurve në emigracion nga Shqipëria në 3 dekada është konstant në ekonominë tonë. Remitancat kanë shënuar rritje në raport me një periudhë të mëparshme. Kjo dëshmon për lidhjen mes njerëzve dhe familjen dhe rretheve familjare që ende është e fortë në rrethanat shqiptare. Kjo kërkon edhe adresimin që ne e kemi bërë me dije që se e kemi të gjithë dëshirën dhe vullnetin që është amnistia fiskale.
Amnistia fiskale do të garantojë formalizimin e të gjitha të ardhurave nga puna e shqiptarëve në diasporë. Ekonomia informale nuk është një territor vetëm i vendeve në zhvillim si Shqipëria, por është një zonë që ekziston edhe në vendet e zhvilluara. Puna në të zezë, pagesat në Cash për punë të paregjistruara janë një konstante edhe në vendet e zhvilluara. Kemi arsye dhe raste për ta bërë më në fund këtë hap i cili ka qenë dashur të bëhet prej shumë kohësh”, tha Rama.
