Ambasadori i Austrisë në Shqipëri, Christian Steiner, ka folur sot në një konferencë për mediat në lidhje me nismën “Open Balkan”. Steiner theksoi se është e rëndësishme që në këtë nismë të respektohen standardet e BE-së. Më tutje ai tha se me aq sa ka në dorë Austria po përpiqet të mbështesë Shqipërinë dhe vendet e tjera të Ballkanit Perëndimor për t’u bërë pjesë të Bashkimit Europian.
Pyetje: Zoti ambasador, Rama thotë që nuk do jemi gati për dasmë. Me këtë deklaratë do të thotë se ka hequr dorë nga kërkesa për të qenë në BE apo kërkon një Europe të vogël me Open Balkan?
“Përsa i përket çështjeve të BE, shpresojmë që negociatat do të hapen shumë shpejt me Shqipërinë dhe Maqedoninë e Veriut. Unë besoj që është edhe shumë e rëndësishme që punojmë së bashku me iniciativa konkrete, jemi në favor që kemi Shqipërinë dhe vendet e tjera të Ballkanit Perëndimor, që të jenë vende anëtare të BE, do të përpiqemi aq sa mundemi. Shpresojmë që mund të kemi negociatat.
Pyetje: Një koment për Ballkanin e hapur?
Ballkani i hapur është një iniciativë rajonale, në parim iniciativat rajonale janë të mira por është e rëndësishme që standardet e BE të respektohen.
Pyetje: Konkretisht, ju e mbështesni?
Siç thashë, për ne standardet janë të rëndësishme dhe iniciativat rajonale duhet të mos bien ndesh me parimet e BE.
