Midis emrave që kanë mbledhur para për kurimin me një terapi për kancerin në një klinikë në Londër të një vogëlusheje greke nga Kreta ka qenë edhe i burgosuri shqiptar Alket Rizai.
Vitet e fundit, Rizai ka bërë një fushatë bamirësie tek të gjithë të burgosurit dhe ka mbledhur një shumë parash në ndihmë të familjes së tetëvjeçares greke.
Mësohet se shqiptari i ka telefonuar babait të vajzës dhe i ka thënë se ka mbledhur një shumë parash nga një grup i madh të dënuarish të këtij burgu për shpenzimet e terapisë.
Rizai ka kërkuar edhe një urdhër ministri, në bazë të ligjit, që do të bënte të mundur që këto para të shkojnë në llogarinë bankare të familjes së vajzës.
Lajmin e kanë transmetuar edhe shumë kanale private të cilat kanë mësuar hollësi nga avokati i Alket Rizait, Sakis Kehajoglou, i cili ka cituar fjalët e tij në këtë përpjekje: “Ajo që ka rëndësi është të shkojë vogëlushja dhe të bëhet mirë. Gjithë të tjerat janë pa vlerë”.
