Deputeti demokrat Tritan Shehu, njëkohësisht anëtar i Komisionit të Rithemelimit, iu ka bërë thirrje deputetëve të grupit parlamentar të PD të mos shkojnë në mbledhjen e sotme të thirrur në mesditë nga Enkelejd Alibeaj për çështjen e Presidentit.
Në një reagim në Facebook, Shehu deklaron se Alibeaj në fund të “takimit” të djeshëm, dekonspiroi thelbin e tij kur foli për një “opozitë për të arritur 84 votat”. Deputeti demokrat i bëri thirrje kolegëve të mos përdoren nga kryeministri Edi Rama për të zgjedhur Presidentin e ri duke u ndarë përfundimisht me elektoratin demokrat.
“Pikërisht, aq sa i duhet Ramës për të zgjedhur i maskuar si liberal një President të tij, pse jo edhe të “propozuar” sa për aparencë nga Alibeja&Co, nqs ai do të siguronte 20 firma propozuesish… Dhe kjo mund të ndodhe edhe në raundin e dytë ose të tretë, nqs Alibeaj&Co do të arrijë të “peshkojë” këto 20 firma opozitarësh koshiente për dëmin e madh që po i bëjnë demokracisë në shkëmbim të…ose që akoma nuk po arrijnë të shikojnë realitetin e të kuptojnë qartë ku synon kjo lojë antidemokratike, që po luhet në shërbim të forcimit të këtij regjimi. Prandaj ju lutem…mos u bëni pjesë e asaj që do t’ju ndante përfundimisht me elektoratin tuaj demokrat. Dhe një deputet pa elektorat nuk është deputet, ai mund të jetë vetëm një rrogëtar…por që shpejt do t’i duhet ta lërë edhe atë”, shkruan ndër të tjera Shehu.
