“Do ta këndojmë himnin tonë kombëtar edhe në Çamëri!” Me këtë deklaratë ju është drejtuar të rinjve në Bujanoc, kreu i Patriotëve të Rinj, Albano Idrizi.
Në këtë krahinë shqiptare është organizuar një konferencë rinore me temë: “Ne, nesër qendër e fuqishme politike, ekonomike e kulturore”, ku morën pjesë të rinj nga Shqipëria, Kosova, Çamëria, Lugina e Preshevës, Mali i Zi dhe Maqedonia.
Në fjalën e tij, kryetari i Forumit Rinor të PDIU tha:
“Problemet e të rinjve në të gjitha trevat shqiptare janë evidente në çdo kohë, por sot jemi këtu që përveçse t’i evidentojmë, t’u japim zgjidhje disa prej tyre. Kudo ka probleme, por më besoni që nëse ne sot flasim shqip në Bujanoc, mbajmë këtë takim e askush s’na pengon, në Çamëri asgjë prej këtyre nuk ndodh, pasi shteti grek nuk e lejon dhe u mohon shqiptarëve liritë dhe të drejtat themelore të njeriut. Natyrisht, për të rinjtë në Luginën e Preshevës duhet bërë më shumë dhe kjo është detyra jonë morale dhe shtetërore, e atyre që drejtojnë.”
