Mjeku Odri Qejvani nëpërmjet rrjeteve sociale ka bërë apel duke ju drejtuar kolegëve të tij në lidhje me rastin e një pacienteje 17 vjeçare me ç’rregullime të spektit autik e cila është infektuar nga koronavirusi.
Mjeku i ka pyetur nëse është i drejtë vendimi i spitalit të cilët nuk e lejuan mamanë e saj ta shoqëronte të bijën brenda spitalit duke marr parasysh të gjitha problemet e saj?
Postimi i plotë:
Mirëmbrëma të gjithëve. Uroj të jeni të gjithë mirë!
Dëshiroj të pyes kolegët që punojnë jashtë në lidhë me një situatë shumë specifike, sesi ndodh në raste të tilla ose në spitalet që ata punojnë.
Një adoleshente 17 vjeçare, me ç’rregullime të spektit autik, infektohet nga koronavirus dhe bën insufiçense respiratore, me Sp02 = 65%.
Në këto kushte, transportohet urgjentisht në spital. E ëma kërkon me ngulm që t’a shoqëroje brenda në spitali gjatë gjithë kohës, për përkujdesje të vazhdimishme ndaj bijes së axhituar dhe me karakteristikat e crregullimeve, që karakterojnë nje te sëmure të tillë që i dimë të gjithë. Njëkohësisht, e ëma shprehet se e ka kaluar infeksionin nga koronavirusi dhe mund t’a vërtetojë atë.
Nga ana tjetër, Spitali refuzon në një mënyrë kategorike shoqërimin e adoleshentes nga një familjar në ambjentet e brendshme të spitalit, edhe pse me karakteristikat e përmendura.
Në këto kushte, e ëma kërkon t’a rikthejë në shtëpi, edhe pse në gjendje shumë të rëndë, për të vazhduar trajtimin në shtëpi, duke u ndier e detyruar të firmos “me dëshirë” refuzimin e trajtimit spitalor të spitalit së bijës.
Pyetja ime është: Në spitalet ku ju punoni, çfarë ndodh në një situatë tillë? A lejohet familjari të shoqerojë nje të semurë në ambientet e brendshme spitalore, duke marrë parasysh edhe lidhjen e femijës me familjarin?
Si funksionon? Këto rregullat strikte të spitaleve, a kanë ndonjë shtojcë për të sëmurë të tillë? Dua të theksoj, që mund të kemi një tjetër humbje jete sot, nesër…
Odri Qejvani,
Mjek i përgjithshëm Urgjenca Paraspitalore,
Spitali Universitar ‘Shefqet Ndroqi’
