Udhëheqësit e grupeve politike të Parlamentit Evropian kanë vendosur njëzëri që Eva Kailit t’i hiqet roli i saj si zëvendëspresidente pasi ajo dhe të tjerët u përballën me akuza penale për marrjen e parave të gatshme dhe dhuratave nga Katari.
“Konferenca e Presidentëve vendosi sot unanimisht t’i propozojë Parlamentit Europian përfundimin e parakohshëm të kompetencave të Eva Kailit”, bëri të ditur kryetarja e Parlamentit Europian, Roberta Metsola.
Sot në orën 13:00, do të votohet në seancë plenare, gjatë së cilës Parlamenti Evropian do të vendosë për përfundimin e kompetencave të Eva Kailit.
Sipas rregullores, nevojitet një shumicë prej dy të tretave të votuesve, që është edhe shumica e deputetëve të Parlamentit Evropian për ta shkarkuar.
Eurodeputetja greke, Eva Kaili ka deklaruar se është e pafajshme dhe “nuk ka marrë ryshfet nga Katari”, tha avokati i saj. Prokurorët belgë kontrolluan 19 shtëpi dhe zyra të parlamentit nga e premtja deri të hënën, duke sekuestruar kompjuterë, telefona celularë dhe qindra mijëra euro. Ata janë akuzuar për “pjesëmarrje në një organizatë kriminale, pastrim parash dhe korrupsion”.
