Gjykata e Rrethit Gjyqësor Durrës, ka vendosur masën e arrestit me burg për 26-vjeçarin, Arbër Tivari, i riu që mbeti në gjendje kome pas aksidentit të rëndë të ndodhur në autostradën Tiranë-Durrës, ku vdiqën Silva Tom Gjergji dhe Roxhesa Klironimi të cilat ishin pasagjere në makinën që drejtohej nga Tivari.
Aksidenti i frikshëm ndodhi në orët e para të mëngjesit të 27 nëntorit pasi makina u përplas me barrierat mbrojtëse të autostradës Tiranë-Durrës. Sipas hetimeve, dyshohet se shkak ka qenë shpejtësia marramendëse me të cilën po qarkullonte makina ku ndodheshin tre të rinjtë.
Lexo edhe: Protesta e dhjetorit, Meta i shkon në zyrë Berishës
Akuza që rëndon ndaj Arbër Tivarit është shkelja e rregullave të qarkullimit rrugor dhe për pasojë është caktuar masa e arrestit me burg pavarësisht se i riu ndodhet në gjendje kome në spitalin e Traumës në Tiranë ku u transportua pas plagëve të shumta që kishte marrë nga aksidenti.
Arbër Tivari nuk është një emër i panjohur për drejtësinë pasi në mars të vitit 2021 ai u qëllua me armë zjarri në dorë nga Alket Buçpapaj i cili po ashtu njihej si person problematik për drejtësinë. Tivari ishte arrestuar edhe më herët për shpërndarje lëndësh narkotike dhe vjedhje.
