Aksi rrugor Kamëz–Valias po shndërrohet çdo ditë e më shumë në një sfidë serioze për qindra qytetarë që e përdorin atë.
Rruga, e cila duhet të ishte një nyje e rëndësishme lidhëse për zonën, ndodhet në një gjendje të rëndë amortizimi, e mbushur me gropa të thella dhe dëmtime të shumta që rrezikojnë sigurinë e drejtuesve të mjeteve.
Automjetet pësojnë dëmtime të vazhdueshme, trafiku rëndohet, ndërsa shqetësimi i qytetarëve rritet nga dita në ditë. Pavarësisht ankesave të shumta dhe realitetit të dukshëm në terren, Bashkia Kamëz duket se ka zgjedhur të mbyllë sytë përballë këtij problemi serioz.
Kryetari i Bashkisë Kamëz, Rakip Suli, nuk ka ndërmarrë asnjë hap konkret për rehabilitimin e këtij segmenti rrugor, duke e lënë atë në një gjendje të mjerueshme dhe të papranueshme për një zonë urbane në zhvillim.
Mungesa e investimeve dhe indiferenca institucionale ngrenë pikëpyetje të forta mbi prioritetet e pushtetit vendor dhe përgjegjësinë ndaj qytetarëve që i kanë dhënë besimin.
Qytetarët e Kamzës dhe Valiasit nuk kërkojnë luks, por siguri dhe dinjitet në infrastrukturë. Aksi Kamëz–Valias ka nevojë urgjente për ndërhyrje, jo për premtime boshe apo heshtje zyrtare. Çdo ditë vonesë përkthehet në kosto më të larta për qytetarët dhe në një tjetër dëshmi të keqqeverisjes lokale.
