Ia ka dalë ta kthejë emrin e saj në një markë, në një terren të ‘egër’ siç është bota e biznesit. Agnesa Vuthaj, vajza e kurorave të bukurisë, në Shqipëri e Kosovë, që prej vitesh është edhe vetë organizatore e këtyre kompeticioneve, në një intervistë për revistaëho.com rrëfen rrugëtimin e saj në botën e modës. Ajo ka arritur të ngrejë linjën e saj të ccantave, të dizenjuara prej saj, dhe është kthyer në një drejtuese e biznesit.
“Koleksioni i çantave dhe i aksesorëve i prezantuar përmes fotosesionit të fundit, ështe një prezantim sa i bukur aq edhe i veçantë, sepse përveç linjës sime sjell edhe trendet e ardhshme të modës. Pranvera është stina ime e preferuar dhe përmes këtij koleksioni kam dashur të sjell pranverë, jo vetëm në stinën e pranverës, por në përditshmërinë e atyre që zgjedhin të bartin çantat dhe aksesorët e koleksionit tim.
Krijimi i linjës sime nuk daton nga data e lançimit në 2013, por ka filluar shumë më herët. Koleksionet e mia bartin përvojën e më shumë se 10 viteve të karrierës sime në fushën e modës dhe të së bukurës.
Çantat dizenjohen nga unë. Deri më tani kam 4 koleksione të çantave, të cilat vijnë në forma, stile dhe materiale të ndryshme. Këpucët ideohen nga dizenjatorët e kompanisë ku prodhoj, bazuar në trendet e ardhshme, ndërsa unë përzgjedh dizajnet që identifikojnë stilin e markës sime dhe përcaktoj ngjyrat, lëkurat, si dhe shtoj detaje që i bëjnë të dallueshme këpucët e mia. Ndërkaq në butikun ‘Agnesa Vuthaj Fashion’ në Prishtinë ofrojmë një zgjedhje të gjerë veshjesh nga marka të ndyshme italiane.”, thotë ajo ndër të tjera për revistën.
