Ish-kryeministri Sali Berisha ka reaguar për strehimin e refugjatëve afganë në vendin tonë. në një postim në rrjetet sociale, Berisha shprehet se strehimi i atyre që kanë si alternativë prerjen e kokave nga talebanët përben detyrim moral por dhe ligjor kombëtar dhe ndërkombëtar për çdo vend të lirë.
Nga ana tjetër, Berisha ka sulmuar kryeministrin Rama, duke u shprehur se reagimi i këtij të fundit është dëshmi e përpjekjeve të tij të turpshme për të përdorur këte vendim për përfitime e interesa personale.
Dy fjalë për afganët në Shqipëri!
Rikthimi pas 20 viteve me shpejtësi në Afganistan i talebanëve, rregjimit me obskurantist që nga mesjeta, përbën një nga ngjarjet më dramatike të historisë së Pasluftës së Dytë Botërore. Ndër të tjera ky rikthim përbën për kombin afgan një kob të zi me pasoja tashmë të njohura dhe katastrofale.
Në këtë aspekt, duke parë avancimin e papërmbajtur dhe kapitullimin pa kushtë të ushtrisë afgane komandanteve të saj dikur krenari e qëndresës për liri le të urojmë që kontigjenti i caktuar për Shqipëri të mund të arrijë shëndosh e mirë në dheun tonë.
Por fjalori prej ordineri të shpëlarë duke sharë dhe anatemuar të tjerët i Edvin Kristaq Ramës pikërisht në njoftimin e tij drejtur shqiptarëve për kërkesën e SHBA dhe vendimin e tij për të pranuar refugjatët afgan është dëshmi e përpjekjeve të tij të turpshme për të përdorur këtë vendim për përfitime e interesa personale politike duke e lidhur atë edhe me vasalitetin e tij të neveritshëm ndaj padronit të tij Vuçiç, ftesën që i ka bërë këngëtarit që mbante koncerte kundër bombardimit të Beogradit ndërkohë që NATO po ndërhynte për të ndaluar kasaphanen e kasapit të Ballkanit ndaj shqiptareve të Kosovës.
Me këtë rast le ti themi Zografit bis se ardhja e afganëve nuk të heq ziftin e vasalit të serbomadhit Vuçiç apo të antishqiptarit që mohon genocidin ciklik të serbëve në Kosovë. Ardhja e afganve në Shqipëri nuk të lanë duart nga thikat që ti për logari të padronit tend dhe si tradhtar i kombit shqiptar i fute pas shpinë Kosovës.
Ndaj dhe duke ju uruar mirëseardhje refugjatëve afgan në Shqipëri, dënoj me ashpërsinë më të madhe përpjekjen banale prej ordineri të Edvin Kristaq Ramës për të shpëlarë fytyrën e tij të nxirë dhe për të ndretuar me sharje të ulta suksesin mbi një dramë të thellë njerëzore. sb
