Ora 12:00 shënon afatin e fundit për dorëzimin e kandidaturave të demokratëve që duan të marrin drejtimin e Partisë Demokratike. Gara është hapur nga Komisioni i Rithemelimit, ku kandidati i vetëm që ka plotësuar deri më tani dokumentet për të qenë kryetar i PD është ish-kryeministri Sali Berisha.
Ish-anëtari i Këshillit Kombëtar Edvin Kulluri dhe anëtari i Këshillit, Fatbardh Kadilli kishin shpallur në media kandidaturën për kreun e partisë, por pak ditë më parë njoftuan tërheqjen nga gara pasi sipas tyre procesi nuk është asgjë më shumë se një farsë e shëmtuar.
Një ditë më parë, Berisha u shpreh se nëse do të jetë i vetëm në garë në datë 22 do mbajë një referendum nëse anëtarët e PD-së e duan si kryetar.
“Do të jem një lider referendar. Nuk jam Edi Rama të shpik rivalë. Nëse zgjidhem me referendum, nëse nuk zgjidhem i nënshtrohem verdiktit të tyre referendar”, tha ai.
Nëse 22 maji miraton Berishën si kreun e demokratëve, atëherë PD mund të shkëpusë marrëdhëniet me SHBA, pasi ambasadorja Yuri Kim ka deklaruar më herët se Amerika nuk do të bashkëpunojë me një të shpallur non grata.
