ADN-ja ka identifikuar trupin e dekompozuar të gjetur një muaj më parë në Malin e Gramozin, në vendin e quajtur “Hau i Kreshovës”. Mësohet se trupi i përket shtetasit Sherif Mukaj, 29-vjeçarit nga fshati Starje i cili rezulton i zhdukur prej 1 nëntorit të vitit të kaluar.
Pavarësisht se nga policia pritej edhe një rikonfirmim me anë të ADN-së, në vendngjarje u gjeten mjaftueshëm prova që i përkisnin këtij shtetasi.
Sipas policisë nga këqyrja e skeletit në pjesën e kafkës është konstatuar një vrimë tejshpuese që dyshohet se mund të jetë shkaktuar nga përdorimi i armës së zjarrit ndërkohë që në cilësinë e provës materiale në pyll bashkë me kufomën u gjetën dhe u sekuestruan një xhup, brenda të cilit kishte një aparat celular dhe një palë çelësa shtëpie që korrespondonin pikërisht me derën e shtëpisë se Mukajt.
Tashmë për policinë nuk ka më dyshime që trupi është i 29 vjeçarit Sherif Mukaj, ndërsa familjarët kanë tërhequr dhe kanë varrosur mbetjet kockore të 29-vjecarit, vrasje e cila deri tani mbetet e pazbuluar nga policia ndërsa pista kryesore ku po hetohet është pikërisht pazaret e drogës.
