Partia Demokrate është rikthyer sërish në qendër të debatit publik pas rezultatit tronditës në zgjedhjet e 6 marsit, ku përveçse nuk fitoi asnjë Bashki, për herë të parë në 30 vite doli forcë e tretë politike.
Shumica dërrmues e demokratëve, fajtorin e shohin tek Lulzim Basha, madje dhe mbështetësit e tij më të afërt, nuk i kanë kursyer kritikat për liderin e PD. Që prej ditës së djeshme, një valë dorëheqjesh ka nisur në parti, nga Agron Gjekmarkaj, Flutura Açka dhe Indrit Vokshi, të cilët kanë hequr dorë nga funksionet që kanë në seli.
Ndërsa sot, PD pritet të dalë me një qëndrim të unifikuar për rezultatin në zgjedhje, ku nisur nga zërat kritikë në mbledhjen e grupit parlamentar, mund të kërkohet dhe një dorëheqje e liderit demokrat, ndonëse ky i fundit ka hedhur poshtë çdo lajm për largimin duke dashur të privatizojë partinë.
Vetëm dje, Basha bëri reagimin e parë për 6 marsin, ku ndonëse ka humbur 5 zgjedhje deri më tani, sërish refuzoi të largohet, duke fyer dhe mbështetësit e tij më të zellshëm.
Mbledhja e djeshme e grupit parlamentar është shoqëruar me debate të fortë ku shumica dërrmuese e deputetëve i kanë kërkuar të japë dorëheqjen. Grida Duma, Ervin Salianji, Agron Gjekmarkaj, etj, i kanë kërkuar të dorëhiqet për t’i hapur rrugë zgjedhjeve në parti dhe emërimit të një lideri të ri në krye të PD.
Zgjedhjet e 6 marsit vulosën fatin politik të Bashës, ku PD doli forcë e tretë, ndërsa vetëm në Rrogozhinë doli e dytë në radhë pas PS. Falë Bashës, PD ka kaluar nga humbja në humbje me rezultate tronditëse, ku për egon e tij personale rrezikohet që vendi të mbesë pa opozitë.
