Partia Demokratike duket se e ka mbyllur me protestat për këtë vit.
Kryetari i PD-së Berisha mblodhi pasditen e kësaj të Marte Këshillin Kombëtar. Gjatë një fjale të mbajtur në nisje të mbledhjes, e transmetuar edhe për mediat, Berisha la të kuptohet se për këtë vit nuk do të ketë më protesta.
Ai uroi festat dhe u i lëshoi një sinjal anëtarëve e simpatizantëve të partisë, për tu përgatitur për vitin që vjen.
“Ndaj dhe duke ju uruar ju të gjithë anëtareve, anëtarëve, simpatizantëve tanë e shqiptarëve për Krishtlindje dhe vitin e ri, uroj që vitin e ardhshëm ta shndërrojmë në një vit të madh shprese, besimi fitoreje, për Shqipërinë dhe shqiptarëve”, tha Berisha.
Kreu i PD-së u shfaq për herë të parë pa syze këtë të Martë, pas sulmit ndaj tij më 6 Dhjetor.
Gjatë fjalës së tij, Berisha u ndal te zgjedhja e kreut të ri të SPAK, lëshoi akuza ndaj kreut të qeverisë Edi Rama dhe tregoi mënyrën se si do të zgjidhen deputetët e PD-së për zgjedhjet e ardhshme parlamentare.
Berisha: Gara për kreun e SPAK, mes 2 klaneve mafioze në PS
Berisha deklaroi këtë të Martë se gara për kreun e ri të SPAK ishte mes klaneve mafioze në PS.
Po ashtu, ai sulmoi edhe ambasadoren amerikane në Tiranë, Yuri Kim.
“Çfarë ndodhi me zgjedhjen e kreut të skap. Në pamje të parë beteja ishte mes Edi Ramës dhe guverantores, që do hyjë në historinë politike të një vendi dhe çdo vendi. Një nga betejat më të turpshme. Një proces i cili duhet të kalonte në përputhje me ligjin e kushtetutën jashtë ndërhyrjeve, u shndërruar në një plasdarmë të paimagjinueshme. Në shumicë menduan se guvernatorja Kim fitoi betejën. Në fakt, nuk është se nuk u përzije guvernatorja, por beteja ishte mes klaneve më mafioze të PS. Ata numra dhe vota kishin pas tyre Edi Ramën në njërën anë, Erion Veliajn, Ulsi Manjan, etj., dhe jo më pak aktive Belinda me Ogertën që shohin çdo natën veten kandidate”, tha Berisha.
“Ajo ç’ka shqiptarët panë ishte vetëm perdja, sepse pas perdes ishte beteja më e ashpër që u zhvillua mes klaneve mafioze të një pushteti, që nuk njeh ligj, kushtetues dhe moral. U ndala në këtë moment se është më recenti ky”, shtoi ai.
“Primare për kandidaturat për deputetë e ministra”
Berisha vlerësoi maksimalisht procesin e primareve për zgjedhjen e kandidatëve për zgjedhjet lokale dhe njoftoi se në të ardhmen ky model do të përdoret për të përzgjedhur deputetët dhe qeveritarët qëndrorë, që nënkupton ministrat e shtetit.
“Çfarë ndodh kur përjashton lirinë, se çfarë shte procesi i “Skap-it”, duhet të ishte një proces vote, anëtarët e atij forumi duhet të votonin me votë të fshehtë, pa ç’ka se nuk i lanë. Në rrafshin filozofik ishte përjashtimi i lirisë dhe votës, ishte proces në të cilin vota nuk duhej të diktohej. Ndaj dhe primaret larg çdo lloj objeksioni ishte risia më madhore që ne kemi sjellë nga themelimi i PD-së deri më sot. Nuk ishin të përsosura, por në tërësinë e tyre mbetën një zhvillim hitorik jo vetëm për PD-në, por edhe për Shqipërinë dhe demokracinë shqiptare.
Çdo problem i krijuar do të shqyrtohet, analizohet dhe pasqyrohet në praktikën tonë të ardhshme, por të jeni të sigurt se ato janë praktika më e mirë që një forcë politike mund të përdor. Shikoni palën tjetër, Edi Rama thotë kemi mënyrën tonë, mënyrën e Enver Hoxhës.
Kandidatët tanë me kandidatët e tij ndryshojnë si nata me ditën, ja ku janë kanë ardhur me një proces demokratik, kurse të tjerët zgjidhen nga klanet mafioze dhe grupet kriminale. Kjo është meritë e demokratëve, të cilën e realizuan me vendosmëri dhe me civilitet. Ne kaluam primaret për drejtuesit tanë, ajo ishte një eksperiencë e shkëlqyer, me përjashtime të rralla. Nuk krijuan çarje apo hatërmbetje të pariparueshme.
Po në këtë parim do kalojnë kandidaturat për deputetë dhe qeveritarë qëndrorë”, tha Berisha.
