Pak para nisjes së evenimentit të madh të Kupës së Botës “Katar 2022” në futboll, vëmendje të madhe ka marrë ceremonia e hapjes. Ajo do të mbahet më 20 nëntor në stadiumin “Al Bayt” në qytetin Jor.
Me orën lokale të Katarit, hapja do të jetë në 19:00.
Nisjen e garës së futbollist e bëjnë më të rëndësishme edhe këngëtarët e njohur që performojnë këngën që më pas kthehet në një hit. Këtë vit ende nuk dihet zyrtarisht se cilët do të jenë këngëtarët, megjithatë FIFA pret të vulosë pjesëmarrjen e grupit BTS dhe sipas mediave të huaja, Shakira mund të jetë sërish në ceremoninë e hapjes.
Por, u përfol gjithashtu se këngëtarja kolumbiane do ta hapë Kupën e Botës jo vetëm me grupin korean, por edhe me artisten e mirënjohur me origjinë shqiptare, Dua Lipën.
Ky lajm që ka qarkulluar prej kohësh tashmë, ka nxitur një reagim nga vetë Dua Lipa. Këngëtarja me famë botërore shkruan në Instastory se nuk do të performojë në “Kupën e Botës” dhe se as nuk do ta ndjekë skuadrën e saj Anglinë, në Katar.
“Ka shumë spekulime se do të të performoj në ceremoninë hapëse të Kupës së Botës në Katar. Unë nuk do të performoj dhe nuk kam qenë në negociata me asnjë platformë. Do të jem duke bërë tifo për Anglinë nga larg. Do të vizitoj Katarin kur të përmbushë të gjitha premtimet që bëri për të drejtat e njeriut kur fitoi të drejtën për të pritur “Kupën e Botës”– ka shkruar Dua Lipa.
