Emri i Presidentit të ri të vendit mbetet ende një mister, pasi deri më tani nuk ka pasur asnjë propozim nga asnjë palë. Por në skenë ka dalë një emër që nuk pritej aspak, emri i Leka Zogut të ri.
Emri i tij duhet marrë në konsideratë, pasi gëzon mbështetje te ndërkombëtarët. Ka qenë një takim ditën e sotme i tij me ambasadoren amerikane Yuri Kim dhe zëvendës ndihmës sekretarin amerikan të shtetit, ambasador i SHBA-së në Londër, Philip Reeker që ka trazuar politikën shqiptare, shkruan Top Channel.
Nga ana tjetër, deputeti Belind Këlliçi dhe analisti Arjan Curri komentuan mbrëmjen e sotme në emisionin “Zonë e Lirë” mbi kandidaturat e mundshme për President të Republikës.
Drejtuesi i emisionit, Arjan Çani i pyeti nëse Princi Leka mund të ishte kandidat i mundshëm për President, ndërsa si Curri edhe Këlliçi e përjashtuan si mundësi.
Analisti Curri u shpreh se nëse do të pranonte të ishte kandidat ai mund të votohej nga Kuvendi, por së pari duhet të heqë dorë nga titulli Princ dhe nga ambicia për të qenë Mbret.
“Nuk shkon edhe Princ dhe President në një Republikë Parlamentare. I duhet të heqë dorë nga titulli.”
Të njëjtin qëndrim mbajti edhe deputeti Këlliçi, i cili shtoi se nuk besonte që Princ Leka do të pranonte të ishte një President i zgjedhur me votat e së majtës dhe të hiqte dorë nga ambiciet e tij.
Kujtojmë se, në vizitën e tij në Tiranë vitin e kaluar, pasi takoi Edi Ramën dhe Lulzim Bashën, Reeker u ndal edhe në rezidencën e Princ Leka Zogut të parë. Ai së bashku me ambasadoren Kim qëndruan për orë të tëra në rezidencë, por askush nuk e di se për çfarë u fol në atë takim.
Ishte hera e parë që një zyrtar i lartë amerikan publikisht takohej me trashëgimtarin e ish-mbretërisë shqiptare, i shkolluar në Angli në akademinë mbretërore Royal Military Academy, Sandhurst, me nota të shkëlqyera. Nuk dihet nëse Leka Zogu i ri do të jetë kandidat për President, por këtë vit ai plotëson edhe kushtet, pasi në 25 Mars ka festuar 40 vjetorin.
