Pas marrjes së çmimit “Michael Jackson Video Vanguard” në mbrëmjen e MTV VMAs, Pink ka mbajtur fjalimin më emocionues për vajzën e saj 6-vjeçare Willow.
Këngëtarja ndau me fansat një histori mbi imazhin e trupit dhe sfidat për të rritur një vajzë të vogël, fjalim që i përloti të gjithë.
37-vjeçarja kujtoi momentin kur vajza e saj i tha: “Unë jam vajza më e shëmtuar që njoh. Unë ngjaj si djalë por më flokë të gjata.”
Por Pink e kishte kundërshtuar duke i thënë “ Je shumë e bukur” dhe i dha disa këshilla shumë të vlefshme.
“Unë i thashë se kur njerëzit bëjnë shaka me mua thonë se dukem si djalë ose kam tipare mashkullore. Më ke parë mua duke i rritur flokët, duke ndryshuar trupin tim? Ne nuk ndryshojmë. Ne i ndihmojmë njerëzit e tjerë të ndryshojnë, kështu që ata mund të shohin të gjitha llojet e bukurisë. ”
Pink e mbylli fjalimin me një mesazh për vajzën e saj e cila ishte në audiencë: “Dhe ti vajza ime e dashur je e bukur dhe unë të dua shumë.”
