Në seancën e fundit të parlamentit është miratuar një ligj i rëndësishëm i cili ndalon ndërtimin e Hidrocentraleve në zonat e mbrojtura.
Drejtori i Agjencisë Kombëtare të Zonave të Mbrojtura, Zamir Dedej ka sqaruar se ky ligj nuk do të lejojë ndërtimin e asnjë HEC-i në zonat e mbrojtura me ligj.
Dedej u shpreh se për ato zona në të cilat tashmë kanë filluar ndërtimet është vështirë ti prishin, por mbeten për t’u parë lejet që janë dhënë por nuk kanë nisur zbatimin.
“Nuk kemi qenë kurrsesi të hapur ndaj aktiviteve me dëmtim sepse për herë të parë në ligjin e zonave të mbrojtura, në park kombëtar është shkruajtur në mënyrë eksplicite se nuk lejohet ndërtimi i Hidrocentraleve. Do të mbyllë atë debat që vazhdon prapë, do të lejohen apo nuk do të lejohen HEC-et.
Për shumë nga këto që janë ndërtuar ne e kemi të vështirë që ti prishim. Duhet të fillojmë të shikojmë ato që quhen masa rehabilituese. Ajo që është ndoshta për tu parë është në ato leje që janë dhënë por nuk janë zbatuar. Prapë do të jetë një gjë që nuk mund ta themi të përgjithshme sepse do të merret rast pas rasti. Di që Ministria e Ekonomisë po bën një punë në evidentimin e rasteve që duhet të pezullohen, tashmë kanë kaluar afatet dhe kjo do të na lehtësojë dhe punën tonë. Por gjithashtu do të shohim dhe ato që janë në ndërtim e sipër se çfarë efekti do të kenë në zonë.”-është shprehur Dedej në një intervistë për Ora News.
Sipas Dedej, të gjitha planet rregulluese që përfshijnë zonat e mbrojtura përmes ligjit të ri do të kalojnë nga Këshilli Kombëtar i Rregullimit të Territorit, çka do të thotë se nëse jepet një leje ndërtimi ajo do të jetë shkelje e ligjit.
“Në ligjin e vjetër ka pasur një konflikt midis shkallëve të mbrojtjes dhe kategorive. Sot ne me ligjin e ri e kemi evituar duke lënë objektivat e mbrojtjes dhe çfarë nuk lejohet në një kategori dhe shkallët e mbrojtjes të cilat lidhen me një specifikë më të veçantë. Kemi futur planin e menaxhimit të një zone të mbrojtur si elementi bazë ku do të gjykohet për veprimtaritë brenda zonës së mbrojtur. Ato diskutohen me komunitetin.
Të gjitha planet rregulluese që përfshijnë zonat e mbrojtura përmes ligjit të ri do të kalojnë nga Këshilli Kombëtar i Rregullimit të Territorit, çka do të thotë se nëse jepet një leje ndërtimi ajo do të jetë shkelje e ligjit.”- sqaron Dedej.
