Pas arritjes së marrëveshjes Rama-Basha, Partia Agrare Ambientaliste është tërhequr sot nga ankimimi në Kolegjin Zgjedhor për shpalljen të pavlefshme të listave shumëemërore të kandidatëve për deputetë, duke ia lënë kështu në dorë datën e zgjedhjeve marrëveshjes së arritur në orët e para të mëngjesit të sotëm.
Kreu i PAA, Agron Duka, konfirmoi lajmin që me sa duket është dhe pjesë e paktit të arritur mes palëve.
“Sapo u bë marrëveshja, vendimi e humb sensin sepse ne padinë e kishim bërë për të shtyrë datën e zgjedhjeve, kur kjo bëhet në një akord politik mendoj që nuk ja vlen më që të vazhdojmë ta ndjekim në rrugë juridike”- tha Duka.
Kolegji Zgjedhor ishte parashikuar të mblidhej sot për kërkesë-padinë.
