Në parlamentin grek gjatë seancës për diskutimin e paketës së re të masave ka plasur sherri.
Gjatë fjalës së tij, Ilias Kasidhiaris, deputet dhe numri 2 i Agimit të Artë ka shtyrë deputetin e Demokracisë së Re, ish-ministrin e Rendit Nikos Dhendias, pasi ka kaluar para tij.
Gjatë kësaj skene, kanë ndërhyrë edhe deputetët e tjerë të Agimit të Artë, që kanë hedhur ujë mbi deputetin e djathtë, duke e kërcënuar atë, ndërsa është dashur edhe ndërhyrja e menjëhershme e gardës së parlamentit, për të nxjerrë jashtë sallës disa prej neonazistëve grekë.
“Harroni që para dy vitesh, për shkak të këtij deputeti të zotit Dhendia, të Samarasit dhe të Athanasiut, zoti Kasidhiari, kryetari i Agimit të Artë dhe deputetët e tjerë të kësaj partie, shkuam në burg me akuza të rreme. Kush nga dy rastet konsiderohet dhunë?”, u shpreh Janis Lagos, deputet i Agimit të Artë.
“Po të mos ishim përmbajtur, do të vraponit të fshiheshit pas dyerve”, ka vazhduar të kërcënojë deputeti Janis Lagos, ndërsa i dëbuari Kasidhiaris, për të cilin parlamenti ka marrë masa administrative, ka vazhduar fyerjet edhe gjatë momentit kur është larguar nga salla.
