Kriza shqiptare ka nisur të marrë vëmëndje në mediat gjermane. Disa prej tyre raportojnë se kriza është thelluar, duke theksuar se gjermano-skocezi David McAllister dështoi në arritjen e një marrëveshje. Por bie në sy se një prej mediave më të rëndësishme gjermane, gazeta konservatore “Frankfurter Allgemeine Zeitung” ka kritikuar ashpër kryeministrin Edi Rama në një shkrim.
“I mbështetur në një shumicë solide në parlament, Rama premtoi se do të kujdeset për një sistem transparent, për zbatim të reformave radikale, sidomos në drejtësi, dhe për zhvillimin e një lufte të vendosur kundër korrupsionit dhe krimit të organizuar. Në fund të mandatit të tij, nga kjo kanë mbetur vetëm fjalët boshe. Shqipëria prin në Europë me prodhimin e kanabisit. Pavarësisht disa operacioneve spektakolare të policisë, ku janë djegur plantacione me kanabis, fushat e mbjella janë shtuar dhe po shfrytëzohen edhe më intensivisht, mes tjerash me farën e bimëve vietnameze, të cilat rriten shpejt. Me prodhimin e hashashit rritet edhe ndikimi i baronëve të drogës, të cilët kanë mjaft para për të korruptuar politikanë, gjykatës dhe policë. Shqipëria, vend anëtar i NATO-s, po shndërrohet në rrezik për sigurinë”.
Duke theksuar dështimin e eurodeputetit gjerman në zgjidhjen e krizës, gazeta shkruan: “Nëse mbahen zgjedhjet e 18 qershorit përkundër rrethanave ekzistuese, Rama e ka të sigurt një fitore me 90 për qind. Problemi është se zgjedhjet pa pjesëmarrjen e opozitës nuk shikohen mirë nga BE, ku Shqipëria dëshiron të anëtarësohet sa më shpejt që të jetë e mundur”.
Ndërkohë në mediat shqiptare ka dominuar kryesisht lajmi se kreu i Kuvendit, Ilir Meta, është refuzuar nga Partia Demokratike. Pavarësisht se Bujar Kapexhiu e sheh Metën si një zjarrfikës, deri më tani ai nuk e ka shuar zjarrin. Madje tani zjarri duket më i madh, pas kërcënimeve të forta të opozitës.
