Prokurorët e Durrësit kanë nisur prej disa ditësh hetimet në pikat doganore prej nga mendohet të kenë hyrë mbetjet sipas mediave italiane.
Prokuroria e Durrësit po heton për lajmin, sipas të cilit 1300 kontenierë me mbetje të rrezikshme kimike, kanë hyrë në territorin shqiptar. Burime zyrtare nga Prokuroria e Përgjithshme bëjnë të ditur se prokuroria e Durrësit është duke hetuar në pikat doganore prej nga supozohet që kanë hyrë mbetjet e rrezikshme. Hetimi ka nisur, pasi mediat italiane, të cilat kanë publikuar për disa ditë me radhë lajmin për hyrjen e këtyre kontenierëve në Shqipëri.
Sipas mediave italiane, kontenierët kishin për destinacion Maqedoninë, por nuk rezulton të kenë dalë nga toka shqiptare. Sipas mediave të vendit fqinj, mbetjet e rrezikshme kimike janë asgjesuar në Shqipëri në kushte krejt të papërshtatshme për kryerjen e këtij procesi.
Nisur nga këto lajme të medias italiane, Prokuroria po heton prej disa ditësh se sa qëndrojnë këto lajme, të cilat nëse rezultojnë të vërteta, përbëjnë një nga skandalet më të mëdha të ndodhura në Shqipëri këto 26 vite.
Prokuroria ka nisur procedurat e marrjes së informacioneve edhe me partnerët italianë. Ndërkohë, po shqyrtohen dokumentacionet dhe po kryhen hetime në rrugë të tjera në pikat doganore prej nga mendohet të kenë hyrë mbetjet.
