Ermal Meta, vazhdon të jetë aktiv pas Sanremo-s, duke prezantuar në Itali albumin e tij me titull “Vietato morire”. Ai ishte i ftuar, siç shkruan Kledi Kadiu, në programin “Amici” të Mediaset të Maria de Filipit, prezantueses së Sanremo-s së fundi, ku Ermali u rendit i treti dhe mori Çmimin e Kritikës.
Gjatë këtij festivali, veç këngës së fuqishme të frymëzuar nga jeta e tij, Ermal Meta interpretoi edhe cover-in “Amara terra mia” të Domenico Modugno-s, me të cilën u shpall fitues mbrëmjen kushtuar këngëve cover. Në vargjet e saj përshkruhet largimi nga toka jote, një tokë e dashur dhe e hidhur dhe e gjitha përshkohet nga melankolia e kësaj shkëputjeje nga rrënjët.
Dje dy artistët shqiptarë janë takuar, duke qenë që sot në orën 14.00 në Canale 5 Ermal Meta ishte i ftuar tek Amici, ku Kledi Kadiu është pjesë e stafit prej vitesh dhe ndoshta me nismën e tij, të dy artistët kanë bërë një foto me duar shenjën e shqiponjës, me të cilën Kledi lajmëron pjesëmarrjen e Ermalit te Amici, si i ftuar.
E ka shpërndarë edhe Ermali, ai që mendohet që flet më pak për Shqipërinë, duke shkruar thjesht, me shkronja të mëdha dhe ortografikisht saktë, te fotoja e vetes dhe Kledit, “Shqiptarë”.
