Japin dorëheqjen gjyqtari i Elbasanit Ilir Pashaj dhe gjyqtarja e Kukësit Drita Velaj. Sot, afati i fundit për formularin e vetingut për 800 gjyqtarë e prokurorë.
Vetting-u ka dhënë rezultatet e para. Gjyqtarja Mirela Fana dha sot dorëheqje si anëtare e Gjykatës së Lartë, si dhe nga Këshilli i Emërimeve në Drejtësi. Dorëheqja e saj vjen në ditën e fundit të afatit të dorëzimit të formularit të vetting-ut. Ajo nuk e ka paraqitur deklaratën e saj për vetting-un dhe ka zgjedhur të tërhiqet nga sistemi. Përveç saj, kanë dhënë dorëheqje gjyqtari Ilir Pashaj, nga gjykata e Elbasanit dhe gjyqtarja e Kukësit Drita Velaj. Vendimi i tyre për dorëheqje vjen në ditën e fundit të afatit të dorëzimit të formularëve të vetting-ut.
Një javë më parë, Mirela Fana, u zgjodh me short si kryetare e Këshillit të Emërimit në Drejtësi, (KED). 27.al ka evidentuar që Mirela Fana ishte pjesë e listës së gjyqtarëve të sistemit të drejtësisë, të cilët kishin të shkuar si hetues gjatë kohës së diktaturës. Përveç këtij faktori që ka ndikuar në dorëheqjen e saj nga sistemi i drejtësisë, është edhe fakti që Mirela Fana hyn në listën e gjyqtarëve më të pasur në sistemin e drejtësisë.
Sot, pritet që të gjithë gjyqtarët dhe prokurorët që hyjnë në garë për të mbetur në sistemin e drejtësisë, të dorëzojnë formularin e vetting-ut. Janë gjithsej 800 gjyqtarë dhe prokurorë që duhet të dorëzojnë këtë formular. Deri në orën 11.00 të ditës së sotme, në total kanë qenë 359 gjyqtarë dhe ndihmës ligjorë që kanë dorëzuar formularët e vetëdeklarimit.
Me dosje dokumentesh dhe formularët e pasurisë shumë gjyqtarë, përfshi ata të Krimeve të Rënda dhe të rretheve si prokuror të kryeqytetit janë paraqitur në ILDKPI për të dorëzuar personalisht formularët. Ndër ata që kanë dorëzuar formularët është kryeprokurori Adriatik Llalla, si dhe kreu i Gjykatës së Lartë, Xhezair Zaganjori.
Pas dorëzimit të këtyre formularëve gjyqtarë e prokurorë do të qëndrojnë në pritje të ngritjes së komisioneve, të cilët do të kryejnë kontrollin e tyre sipas kritereve të përcaktuar në ligjin e rivlerësimit njohur si vetting-u, ku në sitë do të kalojnë dhe raportet e aktorëve të drejtësisë me botën e krimit.
