Gjyqtari: Kam fituar 33 milion lekë në skedina, shpenzimet e udhëtimeve jashtë i kam paguar me paratë e fituara në lloto sportive
Prokuroria e Krimeve të Rënda ka marrë në pyetje 3 gjyqtarët e Gjykatës së Apelit në Durrës, që janë nën hetim për korrupsion pasiv.
Gjyqtarër akuzohen se janë sponsorizuar në dy udhëtime jashtë vendit nga një biznesmen durrsak, i cili ishte palë në një proces civil që po shqyrtohej prej tyre. Të dhënat nga dosje hetimore e BIRN tregojnë se gjyqtarët kanë bërë një udhëtim në Spanjë në tetor 2014, për të parë ndeshjen e futbollit Real Madrid – Barcelona.
Prokuroria dyshon se në këtë udhëtim gjyqtarët shoqëroheshin edhe nga biznesmeni, pronari i një kompleksi turistik në Durrës, i cili ka bërë dhe pagesën. Por, ndërkohë gjatë marrjes në pyetje tre gjyqtarët e Gjykatës së Apelit Durrës kanë mohuar të kenë marrë përfitime nga biznesmeni durrsak.
Gjyqtarët kanë deklaruar se i kanë paguar vetë shpenzimet e udhëtimit. Klinton Spahiu, një nga tre gjyqtarët deklaroi se shpenzimet e udhëtimeve i kishte paguar me paratë e fituara në lloto sportive, me disa skedina fituese.
Ai ka deklaruar se ka fituar në total 2 791 676 lekë dhe 4246 dollarë prej llotove sportive në vitet 2012-2014, që në total arrijnë në mbi 33 milionë lekë të vjetra.
