“Vlerësime ministrit të Jashtëm Ditmir Bushati dhe kontributorëve të tjerë. Kjo shumicë ka meritën që Çështja Çame është në agjendën e bisedimeve me Greqinë.”
Kreu i PDIU-së Shpëtim Idrizi u shpreh se mazhoranca aktuale ka shënuar hapa të rëndësishëm përpara në zgjidhjen e Çështjes Çame. Ai falenderoi ministrin e Jashtëm, Ditmir Bushati dhe të tjerë faktorë, të cilët punuan që Çështja Çame të bëhet një ndër çështjet e rëndësishme për t’u zgjidhur me Greqinë. Idrizi tha se është arritje e madhe që Çështja Çame ka mbërritur deri në Bruksel duke kujtuar deklaratën e komisionerit Johannes Hahn, eurodeputetëve Knut Fleckenstein e Eduard Kukan.
Marrëdhniet me LSI-në
Kreu i PDIU-së u shpreh se nuk ka kurrfarë polemike me LSI-në dhe jo më pakënaqësi. Në lidhje me deklarimet e fundit të ministrit të Drejtësisë, Ylli Manjani. Ai tha se njeriu me portofol i LSI-së, nëse ka pakënaqësi me përbërjen e koalicionit, duhet të ankohet për Ilir Metën, i cili është një nga autorët e ftesës për përfshirjen e PDIU-së në koalicion. Idrizi tha se në këtë koalicion ka hyrë, pasi ka marrë një ftesë të nënshkruar nga Rama dhe Meta. Ai u shpreh: “Ne nuk hymë në një shtëpi, në të cilën është dakord burri dhe nuk është dakord gruaja”.
Koalicioni parazgjedhor
Kreu i PDIU-së foli edhe për koalicionet parazgjedhore dhe debatin për reformën zgjedhore.
“Ne jemi pjesë e koalicionit me parti kryesore PS-LSI, ndërkohë presim ftesë nga më të mëdhenjtë, ndërsa vendimin e marrin forumet e partisë se në cilin koalicion do të jemi në zgjedhje. Por, dua të sqaroj se ne nuk do të bënim koalicion me parti të tjera, nëse nuk do të na detyronte fakti i vjedhjes së votave nga më të mëdhenjtë. Modeli stalinist populli voton dhe numërojnë dy partitë e mëdha, na detyron ne që të bëhemi pjesë e koalcioneve.”
Sa i përket propozimeve të opozitës, për votimin dhe numërimin elektronik, Idrizi u shpreh se mbështet pa asnjë mëdyshje, por theksoi se është vonë dhe nëse PD do ta kishte dashur këtë duhet ta kishte nisur aksionin një vit më parë.
I pyetur pse PDIU nuk ka asnjë ministër në qeveri, por ka disa drejtori të rëndësishme, Idrizi u shpreh: “PDIU nuk ka të punësuar në asnjë ministri, as nëpër bashki”, duke veçuar disi vetëm atë të Tiranës. Sa për drejtoritë, Idrizi u shpreh që PDIU ka marrë atë çfarë i kanë dhënë dhe jo atë çfarë ka kërkuar.
Idrizi i është kthyer sërish propozimit për Ministrinë e Diasporës duke e cilësuar si mjaft të rëndësishme, referuar shifrës 35% e popullsisë shqiptare që jeton në emigracion, diaporë e vjetër dhe e re. Idrizi propozoi kthimin në kohën e Zogut, ku diapora përfaqësohej në kuvend përmes deputetit të “Vatrës” dhe atij të arbëreshve.
