Biznesmeni dhe investitori strategjik Pëllumb Gjoka ka folur për herë të parë publikisht lidhur me akuzat që rëndojnë ndaj tij në kuadër të dosjes “Metamorfoza”, duke mohuar kategorikisht përfshirjen në ngjarjet kriminale për të cilat po hetohet.
Gjoka pretendoi se akuzat ndaj tij janë ngritur mbi bazën e materialeve të platformës Sky ECC, ndërsa tha se ndaj tij është zhvilluar një “gjyq publik”.
“Po gjykohem mbi thashethemet e Sky ECC. Më është bërë gjyq publik. Çfarë nuk kam dëgjuar për veten, më kanë akuzuar se kam vrarë, më kanë akuzuar për trafik etj. Gjyqet publike nuk bëhen për të zbardhur të vërtetën”, deklaroi Gjoka.
Ai u shpreh se prej tre vitesh ndodhet në paraburgim dhe se, sipas tij, ende nuk ka një shpjegim të qartë për përgjegjësitë që i atribuohen.
“Kam 3 vite në paraburgim dhe nuk e di se çfarë kam bërë. Edhe pse prokurorët e dinë që janë gabim, vazhdojnë të mendojnë të njëjtën gjë. Publikisht më kanë dënuar, është mëse e tepërt”, tha ai.
Gjoka ngriti pretendime edhe mbi mënyrën se si ka nisur procedimi penal ndaj tij. Sipas tij, hetimet kanë filluar më herët nga sa është deklaruar zyrtarisht, ndërsa në proces janë përdorur kallëzime dhe materiale që, siç pretendon ai, nuk provojnë përfshirjen e tij.
Biznesmeni mohoi të ketë qenë përdorues i platformës Sky ECC, duke theksuar se nuk ka asnjë provë shkresore që e lidh atë me këtë platformë komunikimi.
“Unë jam në burg për një sekret. Si e identifikon ti kodin e përdoruesit, kur janë 15 mijë vetë që përdorin Sky? Unë nuk kam qenë përdorues i Sky. Nuk ka asnjë provë shkresore që unë mund të jem përdorues i Sky”, u shpreh ai.
Gjoka foli edhe për akuzën që lidhet me vrasjen e Gjin Ndoj, duke deklaruar se sipas akuzës ai paraqitet herë si organizator i ngjarjes dhe herë si person që ka pasur dijeni për të.
“Kushdo që ka bërë vrasjen, kushdo që ka ndihmuar në vrasje, kushdo që u ka dhënë makinë vrasësve, është kriminel”, tha ai.
