Kryetari i Partisë Demokratike, Sali Berisha, ka hedhur akuza ndaj qeverisë lidhur me krijimin e shoqërisë shtetërore Albanian Digital Solutions (ADS), të cilën e cilësoi si një strukturë të ngritur për të kanalizuar fonde publike pa mekanizma të qartë kontrolli.
Në një deklaratë për mediat, Berisha e quajti ADS-në “minierë floriri të familjes Rama”, duke pretenduar se kompania është krijuar pa një vendim të posaçëm të Këshillit të Ministrave që të përcaktojë qartë kompetencat, funksionimin dhe marrëdhënien e saj me Agjencinë Kombëtare të Shoqërisë së Informacionit (AKSHI).
Sipas tij, nuk ekziston asnjë ligj apo vendim qeverie që të përcaktojë objektin e veprimtarisë së ADS-së, ndërsa të gjitha kompetencat, sipas pretendimeve të opozitës, janë lënë në dorë të aksionarit kryesor, AKSHI.
Berisha iu referua një vendimi të Këshillit të Ministrave të datës 20 maj 2026, përmes të cilit është miratuar një fond prej 7 milionë eurosh në favor të ADS-së. Ai theksoi se ky vendim është miratuar rreth dy javë pas regjistrimit të kompanisë në Qendrën Kombëtare të Biznesit.
Kreu i opozitës argumentoi se vendimi në fjalë nuk përcakton objektin e veprimtarisë së shoqërisë, nuk miraton statutin, nuk sqaron kompetencat dhe as mekanizmat e kontrollit të saj. Gjithashtu, sipas tij, nuk jepen sqarime mbi regjimin e prokurimeve apo arsyet e krijimit të kësaj kompanie.
“Është krijuar një monstër për të vjedhur në mënyrë të pandalshme”, deklaroi Berisha, duke shtuar se vendimi i vetëm i njohur publikisht për ADS-në parashikon vetëm financimin e saj me 7 milionë euro.
