Një nga netët më të rëndësishme të karrierës së Ivan Balliut do të jetë sot.
Futbollisti i Kombëtares shqiptare ka mundësinë të shkruajë historinë me Rayo Vallecanon, teksa skuadra spanjolle përballet me Cristal Palace në finalen e Ligës së Konferencës, duke nisur nga ora 21:00.
Për Balliun, kjo është një mundësi e artë për të fituar trofeun e parë europian në karrierë dhe për t’u bërë një nga shqiptarët e rrallë që triumfojnë në një finale të UEFA-s.
Finalja premton spektakël, pasi të dy skuadrat kanë qenë surprizat më të mëdha të këtij sezoni europian.
Cristal Palace mbërriti deri këtu falë organizimit të fortë dhe intensitetit fizik, ndërsa Rayo Vallecano fitoi zemrat e tifozëve me lojën sulmuese dhe futbollin e bukur.
Skuadra nga Madridi ka treguar personalitet në çdo fazë të kompeticionit dhe tani ndodhet vetëm një hap larg historisë. Ivan Balliu ka qenë një nga lojtarët më të rëndësishëm të ekipit gjatë sezonit, duke dhënë siguri në repartin mbrojtës dhe shumë energji në krahun e djathtë.
Atmosfera pritet të jetë elektrizuese, me mijëra tifozë anglezë dhe spanjollë që do të mbushin stadiumin për finalen e madhe.
Për tifozët shqiptarë, vëmendja do të jetë tek Ivan Balliu, i cili sonte mund të përjetojë natën më të madhe të karrierës së tij.
