Presidenti amerikan Donald Trump dhe sekretari i Shtetit, Marco Rubio, kanë lëshuar kërcënime të reja për veprime ushtarake kundër Kubës, duke rritur më tej tensionet mes Uashingtonit dhe Havanës.
Marco Rubio deklaroi të enjten para gazetarëve se Kuba prej vitesh përbën një kërcënim për sigurinë kombëtare të SHBA-së për shkak të lidhjeve të saj me Rusinë dhe Kinën. Nga ana tjetër, Donald Trump tha se ka gjasa të jetë presidenti amerikan që “më në fund do të veprojë” ndaj regjimit kuban.
Administrata Trump, me Rubion në vijën e parë të politikës ndaj Kubës, ka shtuar presionin ndaj ishullit të drejtuar nga komunistët, në atë që mediat ndërkombëtare e interpretojnë si një përpjekje për ndryshim regjimi. Masat përfshijnë një bllokadë të furnizimeve me karburant, e cila sipas raportimeve ka çuar ekonominë kubane pranë kolapsit.
Presioni amerikan është përshpejtuar ditët e fundit, pas akuzës penale të ngritur nga SHBA ndaj ish-presidentit kuban Raúl Castro dhe shtimit të pranisë ushtarake amerikane në Karaibe.
Duke refuzuar krahasimet me ndërhyrje të mëparshme amerikane për “ndërtim kombesh”, Rubio deklaroi se çështja kubane lidhet drejtpërdrejt me sigurinë kombëtare të SHBA-së. Ai shtoi se megjithëse një marrëveshje diplomatike mbetet opsioni i preferuar i Uashingtonit, mundësitë për dialog me Havanën janë të kufizuara.
“Sistemi i tyre ekonomik nuk funksionon. Është i dështuar dhe nuk mund të reformohet me sistemin aktual politik”, deklaroi Rubio.
Sipas tij, Kuba ka fituar kohë për vite me radhë duke pritur ndryshime në politikën amerikane, por kësaj here, administrata amerikane synon të mbajë një qëndrim më të ashpër dhe të vazhdueshëm.
Në deklarata të ndara, Donald Trump tha se presidentët amerikanë kanë konsideruar prej dekadash mundësinë e ndërhyrjes në Kubë, por sipas tij “duket se ai do të jetë presidenti që do ta bëjë”. Trump shtoi se do të ishte “i kënaqur” nëse ndërmerrte një hap të tillë.
Reagimi i Havanës ishte i menjëhershëm.
Ministri i Jashtëm kuban, Bruno Rodríguez, akuzoi Marco Rubion se po përdor deklarata të rreme për të nxitur një agresion ushtarak kundër Kubës.
“Sekretari amerikan i Shtetit gënjen edhe një herë për të nxitur një agresion ushtarak që do të sillte derdhje gjaku kuban dhe amerikan”, deklaroi Rodríguez.
Që nga rikthimi në Shtëpinë e Bardhë, Trump ka vendosur sanksione të reja ndaj Kubës, ka forcuar bllokadën energjetike dhe ka mbikëqyrur shtimin e forcave ushtarake amerikane në rajon.
Kërcënimet e fundit vijnë në një moment tensionesh të larta mes dy vendeve. Të mërkurën, SHBA akuzoi zyrtarisht Raúl Castron në lidhje me rrëzimin e një avioni në vitin 1996.
Një ditë më pas, autoritetet arrestuan Adys Lastres Morera, motrën e një drejtuesi të lartë të konglomeratit ekonomik GAESA, grup i kontrolluar nga ushtria kubane dhe që dominon sektorë të rëndësishëm të ekonomisë së vendit.
Gjatë javës së fundit, administrata amerikane vendosi gjithashtu sanksione të tjera ndaj qeverisë kubane. Ndërkohë, ushtria amerikane njoftoi se disa anije luftarake, përfshirë një aeroplanmbajtëse, kanë mbërritur në Karaibe për stërvitje detare me partnerë të Amerikës Latine.
Marco Rubio deklaroi gjithashtu se Kuba kishte pranuar paraprakisht një ofertë amerikane prej 100 milionë dollarësh ndihmë në këmbim të reformave, por shtoi se mbetet e paqartë nëse Uashingtoni do të pranojë kushtet e Havanës, pasi SHBA kërkon të shmangë çdo bashkëpunim me konglomeratin ushtarak GAESA.
Analistët paralajmërojnë se Trump dhe Rubio mund të synojnë ndaj Kubës një strategji të ngjashme me atë të përdorur në Venezuelë për ndryshim regjimi. Presidenti venezuelian Nicolás Maduro dhe bashkëshortja e tij u arrestuan në një operacion ushtarak në janar dhe u dërguan në SHBA, ku Maduro u akuzua për “narkoterrorizëm”.
Rubio vazhdon të argumentojë se Kuba përbën kërcënim serioz për SHBA-në për shkak të bashkëpunimit në fushën e sigurisë dhe inteligjencës me Kinën dhe Rusinë.
Të dyja vendet kanë kritikuar presionin amerikan ndaj Kubës.
Kina deklaroi të premten se “mbështet fuqimisht” Kubën dhe i kërkoi SHBA-së të ulë tensionet dhe “të ndalojë kërcënimet me forcë”.
Edhe Kremlini reagoi përmes zëdhënësit Dmitry Peskov, i cili deklaroi se “në asnjë rrethanë nuk duhet të përdoren metoda që afrohen me dhunën ndaj ish-udhëheqësve apo liderëve aktualë të shteteve”.
