Qytetarë të shumtë shprehen të revoltuar për faturat e larta të ujit që po u shkojnë në banesa muajt e fundit. Sipas tyre, pas zëvendësimit të ujëmatësve nga UKT, vlera e faturave është rritur ndjeshëm, duke arritur deri në 80 apo 90 mijë lekë të vjetra për familje.
Qytetarët denoncojnë se vetëm kostoja e ujëmatësit të ri, bashkë me vulën dhe pajisjet e montimit, arrin nga 40 deri në 45 mijë lekë të vjetra. Kësaj i shtohet edhe konsumi mujor i ujit për një familje normale, që sipas tyre shkon rreth 15 mijë lekë të vjetra, si dhe taksat bashkiake, duke bërë që fatura finale të rezultojë më e lartë edhe se energjia elektrike.
Ajo që ngre më shumë dyshime është mungesa e transparencës. Në faqen zyrtare të UKT-së nuk gjendet asnjë informacion i detajuar lidhur me tenderin e ujëmatësve, kompaninë fituese, mënyrën si është zhvilluar gara apo koston reale të pajisjeve.
Nga verifikimet e kryera në tregun e lirë, një ujëmatës standard kushton jo më shumë se 8 euro, ndërsa në faturat e qytetarëve ai rezulton të faturohet me vlera që afrohen me 40 mijë lekë të vjetra. Diferenca ngre pikëpyetje serioze mbi mënyrën e prokurimit dhe menaxhimit të këtij procesi.
Shumë banorë ankohen se nuk kanë mundësi ekonomike të përballojnë fatura të tilla, ndërsa shtojnë se ndërrimi i ujëmatësve duket se është kthyer në një praktikë që përsëritet sa herë ndryshojnë drejtuesit e institucionit.
Dyshimet janë të forta nëse kemi të bëjmë me një procedurë normale apo me një skemë të favorizimit dhe fryrjes së kostove në kurriz të qytetarëve.
