SPAK ka firmosur një fletëthirrje të dytë për ish-futbollistin e kombëtares shqiptare Igli Tare, duke i kërkuar të paraqitet për të dëshmuar në kuadër të hetimeve ndaj ish-zv.kryeministres dhe ish-ministres së Infrastrukturës Belinda Balluku. Burime pranë SPAK bëjnë me dije se dëshmia e Tares konsiderohet me rëndësi për hetimet që lidhen kryesisht me verifikimin e pasurisë së Ballukut dhe transaksioneve të mundshme të lidhura me persona apo kompani nën hetim. Fletëthirrja e parë ndaj Tares nuk u ekzekutua pasi ai jeton jashtë Shqipërisë dhe nuk kishte marrë dijeni zyrtare për kërkesën e prokurorëve.
Thirrja e dytë vjen pas një serie kontrollesh të zhvilluara nga hetuesit e SPAK në banesa të familjarëve të Belinda Ballukut dhe në ambiente të lidhura me biznesmenë të ndryshëm. Hetuesit kanë ushtruar kontrolle edhe në dy vila në zonën rezidenciale të Drimadhes, ku dyshohet se po verifikohen investime dhe pasuri të lidhura me persona të përfshirë në hetim. Sipas burimeve hetimore, SPAK ka marrë masa që kësaj here Igli Tare të njoftohet zyrtarisht në adresën e tij jashtë vendit për të siguruar paraqitjen në dëshmi.
Belinda Balluku po hetohet nga SPAK për dyshime mbi abuzime me tendera publikë, përfshirë projektin e tunelit të Llogarasë dhe lotet e Unazës së Madhe në Tiranë. Javët e fundit hetimet janë intensifikuar në drejtim të pasurisë dhe lidhjeve financiare të ish-ministres. Aktualisht ndaj saj janë në fuqi dy masa sigurie, ndalimi për të dalë jashtë vendit dhe pezullimi nga ushtrimi i funksioneve publike, ndërsa Balluku i ka kundërshtuar këto masa me rekurs në Gjykatën e Lartë.
