Kryetari i Kuvendit, Niko Peleshi, i është drejtuar zyrtarisht Komisionit të Venecias me një kërkesë për opinion mbi projektligjin “Për financimin e partive politike”. Në shkresë, Peleshi ka kërkuar vlerësimin e Komisionit të Venecias lidhur me këtë projektligj, i cili synon rregullimin e kuadrit ligjor për financimin e subjekteve politike në Shqipëri.
Projekt-opinioni pritet të diskutohet dhe të miratohet në Sesionin e 147-të Plenar të Komisionit të Venecias, që do të zhvillohet më 12–13 qershor 2026. Drafti parashikon një sërë ndalimesh se kush nuk mund të dhurojë para për partitë, duke përfshirë të gjitha kompanitë që kanë kontrata koncesioni, apo PPP.
Projektligji përcakton qartë që qytetarët e thjeshtë mund të dhurojnë për partinë deri në 200 mijë lekë në një vit, ndërsa personat që kanë një NIPT deri në 500 mijë lekë, dhe kompanitë deri në 1 milionë lekë për një vit. Gjithashtu, projektligji parashikon që paratë e buxhetit të shtetit për partitë politike të shpërndahen përmes një Fondi Publik Vjetor, i cili nuk mund të jetë më i ulët se ai i vitit paraardhës në vitet jozgjedhore.
gijotina.com/
