Ish-presidenti Ilir Meta është paraqitur sot në ambientet e reja të Gjykata e Posaçme Kundër Korrupsionit dhe Krimit të Organizuar, ku po mbahet seanca e dytë në themel.
Seanca gjyqësore ndaj Metës dhe të pandehurve të tjerë është shoqëruar me tensione dhe debate që në nisje të saj.
Raportohet se avokati i kreut të Partisë së Lirisë kërkoi që procesi të zhvillohej me dyer të hapura për mediat dhe të transmetohej “live”.
Kërkesa u refuzua nga gjykata, e cila argumentoi se seanca është publike, por nuk mund të kthehet në një aktivitet politik. “Ky nuk është miting,” u shpreh gjykata gjatë debatit në sallë.
Në diskutim ndërhynë edhe Klevis Balliu dhe Tedi Blushi, të cilët deklaruan se jashtë sallës ndodheshin qytetarë dhe mbështetës që kërkonin të ndiqnin seancën, por nuk po lejoheshin të hynin.
Diskutime në sallë:
Gjykata: Në momentin kur konstatohet se kanë marrë dijeni për nisjen e procesit dhe që kanë firmosur, gjykata vendos që gjyqi të zhvillohet në mungesë të tyre.
Debate mes avokatit të Metës dhe gjykatës, pasi kamerat filmuan pesë minuta dhe u urdhërua të dalin.
Gjykata: Çdo shtetas i kësaj republike ka të drejtë të vijë ta ndjekë gjykimin. Por e kemi vendosur që kamerat do të qëndrojnë fare pak.
Avokati: Kam bërë kërkesë që doja ta bëja në prani të kamerave. Në nenin 339 dhe në Konventën Europiane, dhe duke nisur nga koha e diktaturës, proceset e rëndësisë së veçantë, duke nisur nga grupet armiqësore të Enver Hoxhës, janë bërë edhe me altoparlantë.
Gjykata: Kjo është një seancë publike.
Avokati: Jo, ju s’po bëni gjykim publik. Edhe salla është e vogël, mbase do të vijë gjithë partia, s’ka vend; ka vend vetëm për 30 veta.
Gjykata: Pra ka të tjerë që kanë ardhur e nuk hyjnë dot?
Monika Kryemadhi: Po, po, ja për shembull Miranda Rira, pedagoge. S’është vetëm Miranda, janë 200 veta.
Avokati i Metës: Ja dinjiteti njerëzor, presidenti në kafaz me xhama. Ku e keni dinjitetin me këto sallat e reja? Ja ku janë tenderat. Presidenti në kafaz, me kë talleni ju? S’jemi budallenj.
Klevis Balliu nga salla: Ka njerëz jashtë, 200 veta.
Tedi Blushi: Ka njerëz jashtë që duan të ndjekin gjyqin dhe s’po i lënë.
Gjykata: Ky nuk është miting.
