Televizioni shtetëror iranian raporton se asnjë delegacion nga Irani nuk është nisur ende drejt Pakistanit për të marrë pjesë në bisedimet e paqes me SHBA-në. Nuk është ende e qartë nëse ata do të marrin pjesë në bisedimet e sotme, pavarësisht presionit nga ndërmjetësit.
Transmetuesi shtetëror shkroi në një postim në Telegram se “asnjë delegacion nga Irani nuk ka udhëtuar drejt Islamabadit, as kryesor, as dytësor, as fillestar dhe as vijues”.
Ndërkohë, Axios raporton se nënpresidenti amerikan JD Vance pritet të niset drejt Islamabadit të martën në mbrëmje për bisedime me Iranin, një ditë para skadimit të armëpushimit.
Steve Witkoff, i dërguari special i Donald Trump, i cili shpesh vepron si një sekretar shteti de facto, si dhe Jared Kushner, dhëndri dhe këshilltari i presidentit, pritet gjithashtu të udhëtojnë drejt kryeqytetit pakistanez për këto bisedime.
Sipas raportimit të Axios, Irani ka vonuar procesin për shkak të presionit të mundshëm nga Garda Revolucionare ndaj negociatorëve për të mbajtur një qëndrim më të ashpër dhe për të këmbëngulur se nuk mund të ketë diplomaci ndërkohë që SHBA-ja po bllokon Ngushticën e Hormuzit., shkruan the Guardian.
Irani ushqen një mosbesim të thellë ndaj SHBA-së, pasi është sulmuar më parë gjatë negociatave të mëparshme.
Ndërkohë të paktën 26 anije të “flotës hije” iraniane kanë kaluar bllokadën amerikane në Ngushticën e Hormuzit, sipas Lloyd’s List.
Që nga hyrja në fuqi e bllokadës amerikane më 13 prill, deri tani 26 anije kanë vazhduar lëvizjen drejt dhe nga portet iraniane dhe kanë eksportuar ngarkesa me origjinë iraniane, sipas të dhënave detare. Lloyd’s List bën të ditur se 11 cisterna me ngarkesa iraniane janë larguar nga Gjiri i Omanit ose nga Gjiri Persik që prej asaj date.
Irani e kishte mbyllur zyrtarisht ngushticën më 4 mars për vendet “armiqësore”, në përgjigje të sulmeve ajrore SHBA-Izrael ndaj vendit, ndërsa më pas e rihapi përkohësisht të premten, pas një marrëveshjeje armëpushimi 10-ditore mes Izraelit dhe Libanit.
Megjithatë, gjatë fundjavës zyrtarët iranianë deklaruan se po e mbyllnin sërish në mënyrë efektive këtë rrugë strategjike detare, pasi SHBA njoftoi se nuk do ta ndërpriste bllokadën ndaj porteve iraniane.
Që nga nisja e bllokadës, SHBA ka urdhëruar 27 anije të kthehen pas ose të rikthehen në portet iraniane, sipas një postimi të publikuar nga Centcom në rrjetet sociale.
