Pas mbledhjes së qeverisë, ministri për Pushtetin Vendor, Ervin Demo, ka folur lidhur me rikthimin e Bordit të Transparencës një javë më parë, në një moment kur çmimi i naftës arriti në 217 lekë për litër.
I pyetur për masat e ndërmarra, Demo deklaroi se gjatë ditës së sotme pritet një vendimmarrje nga Bordi.
“Bordi sot do të mblidhet, është duke marrë gjithë informacionin sa i përket lëvizjes së çmimeve dhe mbi të gjitha ndryshimeve që ka çmimi i bursës. Bordi do të dalë me një vendimmarrje sot”, tha ministri.
Lidhur me ndikimin konkret të rritjes së çmimeve, ai u shpreh i rezervuar, por theksoi se fokusi kryesor mbetet garantimi i transparencës dhe ndërhyrja kur është e nevojshme për të lehtësuar barrën mbi qytetarët.
“Nuk mund të flas në detaje, rritja e çmimit të naftës dhe aq më tepër inflacioni që ajo sjell në produktet në një bazë të gjerë kërkon një kohë të caktuar. Të garantojmë transparencën duke filluar me produktet bazë dhe ato si nafta që të mos ketë spekulim në treg. Qeveria është e gatshme të marrë masat e duhura kur ne gjykojmë që barra për qytetarët është jo e vogël dhe do të marrim masat e duhura nëpërmjet Bordit ose institucioneve të tjera”, tha Demo.
Ndërkohë, qeveria pritet të përcaktojë edhe përbërjen e Bordit të Transparencës, një strukturë e ngritur më 19 mars, kur çmimi i naftës shënoi një rritje të fortë. Aktualisht, çmimi duket i stabilizuar në rreth 214 lekë për litër, çka ka shtyrë një pjesë të qytetarëve të furnizohen në vendet fqinje.
Situata ka krijuar shqetësim edhe në sektorin e bujqësisë. Fermerët raportojnë rritje të kostove për shkak të çmimit të naftës dhe plehrave kimikë, duke paralajmëruar se një pjesë e tokave mund të mbeten pa u punuar.
