Filantropi dhe mendimtari i njohur amerikan me rrënjë shqiptare, Nicolas Berggruen, dhe vëllai i tij, historian arti, Olivier Berggruen, u nderuan me titullin akademik “Doctor Honoris Causa” nga Universiteti “Aleksandër Moisiu” i Durrësit.
Titulli iu dorëzua vëllezërve nga rektori i universitetit Prof. DR. Shkëlqim Fortuzi dhe kreu i qeverisë. Vëllezërit Berggruen janë nipër të aktorit të madh Aleksandër Moisiu, emrin e të cilit mban sot universiteti i Durrësit.
“Është një nder i madh për mua dhe një moment shumë i veçantë, se më lidh personalisht me të kaluarën dhe me rrënjët e mia. Figura e Aleksandër Moisiut është shumë domethënëse për mua, pasi ai u rrit këtu, por arriti të ndërtojë një karrierë të madhe në Evropë. Shqipëria është një vend i ri dhe plot shpresë”, u shpreh filantropi dhe nipi i Aleksandër Moisiut Nicolas Berggruen.
Ceremonia qe një moment i veçantë jo vetëm për universitetin e Durrësit, ndërsa riktheu në vëmendje lidhjen e familjes Berggruen me figurën e Aleksandër Moisiut dhe trashëgiminë kulturore shqiptare.
Aktori i njohur gjerman Gedeon Burkhard ishte i pranishëm në ceremoninë e dhënies së titullit “Doctor Honoris Causa” për vëllezërit Nicolas dhe Olivier Berggruen në Universitetin “Aleksandër Moisiu” në Durrës.
Prania e tij, si stërnip i aktorit me famë evropiane Aleksandër Moisiu, përveç nipërve Berggruen të Moisiut që u nderuan nga UAMD, e bëri dhe më emocionale ceremoninë.
Burkhard është i mirënjohur për rolet e tij, mes të cilave ato në filmat “Komisari Rex” dhe “Të pamëshirshmit”.
Ai mbajti një profil të ulët dhe tejet modest gjatë pranisë në universitet, ndaj pakkush e njohu.
gijotina.com/
